Búgin Ortalyq kommýnikatsiialar qyzmetinde brifing ótkizgen Bilim jəne ǵylym ministrliginiń ókilderi «Qazaq tili» men «Qazaq ədebieti» pənderi jalpy jikteýishten alynbaǵanyn resmi məlimdedi, - dep habarlaidy QazAqparat agenttigi.
Bilim vitse-ministri Elmira Sýhanberdieva ótken senbiden jeksenbige qaraǵan túni ministrliktiń saityna shabýyl jasalǵan aitty. Sonymen qatar, ol jikteýish qujattyń ózgergeni týraly aqparattyń jalǵan ekenin resmi məlimdedi.
Joǵary jəne joǵary oqýdan keiingi jikteýishten «Qazaq tili» jəne «Qazaq ədebieti» pənderi joiyldy degen aqparat shyqqan soń, bir top akademikter Premer-Ministr Baqytjan Saǵyntaevtyń atyna ashyq hat joldaǵan edi. Bilim ministrliginiń Joǵary jəne joǵary oqýdan keiingi bilim departamentiniń direktory Darhan Ahmed-Zaki ol akademikter qandai mətindi ashyq hatqa qol qoiǵanyn túsinbeýi de múmkin deidi.
«Qazir Qazaqstanda jalǵyz zańdy túrde bekitilgen qujat bar. Ol - joǵarǵy oqý jəne joǵarǵy oqýdan keiingi jikteýish. Osy qujat 2009 jyly bekitilgen, sodan beri ózgergen joq. Osy mamandyqtarǵa bailanysty keiin memlekettik granttar bólinedi, al, qazir «Qazaq tili» jəne «Qazaq ədebiet» pənderi boiynsha jeti myńnan asa maman oqyp jatyr. Onyń ishinde eki myńnan astamy grantta. Jalpy, biyl da, keleshekte de ol baǵytta ózgerister bolady dep kózdep otyrǵan joqpyz», - dedi departament direktory.
«Ərine, meniń oiymsha qol qoiǵan kezde ol akademikterge de belgili aqparatty durys jetkizbegen shyǵar. Sondyqtan, ókinishke qarai, ol kisiler bilmei qol qoiǵan. Al, ashyq hattyń ishinde aitylǵandai «Qazaqstandaǵy mamandyqtardyń arasynan qazaq tili sabaǵy ketti» degen aqparat shyndyqqa janaspaidy», - dedi ol.
