QR Bilim jáne ǵylym ministri Erlan Saǵadiev «Jas Alash» pen «Tribýna» basylymdary bas redaktorlarynyń Almatyda ótetin basqosýǵa shaqyrǵan hattaryna áleýmettik jeli arqyly jaýap berdi, dep habarlaidy Ult.kz tilshisi. 22 qazanǵa josparlanǵan basqosý mektepterinde oqytýdyń úsh tilde júrgizilý máselesine arnalmaq.
Taiaýda QR Bilim jáne ǵylym ministrligine «Jas Alash» gazetiniń bas redaktory Rysbek Sársenbai men «Tribýna» gazetiniń bas redaktory Janbolat Mamai attarynan Bilim jáne ǵylym ministri Erlan Saǵadievti Almatyda ótkiziletin basqosýǵa shaqyrý haty kelip tústi. 22 qazan kúnine josparlanǵan bul jiynda respýblikamyzdyń mektepterinde oqytýdyń úsh tilde júrgizilý máselesi talqylanbaq.
Osy hatqa jaýapty BǴM Feisbýk áleýmettik jelisindegi resmi paraqshasynda jariialady.
«Qurmetti Rysbek Sársenbaiuly, Janbolat Mamai!
Eń aldymen, Almatyda uiymdastyryp jatqan jiyndaryńyzǵa QR Bilim jáne ǵylym ministri Erlan Saǵadievti shaqyrǵan hatyńyzdyń nazarsyz qalmaǵanyn jetkizgimiz keledi.
Búginderi bizdiń táýelsiz elimizde qazaq tilin – memlekettik tildi damytý máselesi kim-kimdi de bei-jai qaldyrmasy anyq. Sizderdiń taraptaryńyzdan osy baǵytta únemi kóterilip júrgen máseleler jaiynda habardarmyz. Bilim salasynyń jaǵdaiyna bailanysty óz kózqarastaryńyzdy bildirip, ashyq jáne jariialy túrde alańdaýshylyq bildirgenińiz – quptarlyq jait dep bilemiz. Degenmen, memleket atynan bilim jáne ǵylym salasyn damytý mindeti júktelgen ministrlik retinde Sizderdiń keltirip júrgen keibir dáieksiz pikirlerińizben kelise almaimyz.
Sondyqtan da, QR Bilim jáne ǵylym ministrliginiń Sizdermen pikir almasyp, búgingi kúni bilim salasynda ótkizilip jatqan reforma men onyń aiasynda engizilip jatqan kóptegen jańashyl úderister jóninde tolyqqandy aqparat berip, mindet-maqsattaryn túsindirýge múddeli.
Osy tusta taǵy bir aita keterlik jait bar. 22 qazan kúni QR Bilim jáne ǵylym ministri Erlan Saǵadievtiń qyzmettik kúntizbesinde birqatar memlekettik mańyzy bar is-sharaǵa qatysý josparlanyp qoiylǵan. Olardyń bári de Astana qalasynda ótetindikten, belgilengen kúni ministrdiń Almatydaǵy kezdesýge qatysý múmkindigi bolmaitynyna túsinistikpen qaraisyzdar dep úmittenemiz», - dep jazylǵan hat mátininde.
Esesine, áriptesterimen birge talqylap, bir sheshimge keler degen nietpen ministrlik tarapynan ózekti taqyrypty talqylaý boiynsha eki usynys jasalady.
«1. Sizder qarsy bolmasańyzdar, Almatyda ótetin sharaǵa memlekettiń bilim salasyn damytý saiasatyn qoldap, reformalardy iske asyrýǵa belsene atsalysyp júrgen bir top mamandar, laýazym ieleri jáne azamattyq qoǵam ókilderi qatysýǵa daiyn.
2. 26 qazan kúni Astanada bilim uiymdarynda qazaq tilin oqytý, onyń qoldaný aiasyn barynsha keńeitý arqyly memlekettik tildi damytý máseleleri talqylanatyn dóńgelek ústel otyrysy ótkizilmek. Sizderdi osy is-sharaǵa qatysýǵa shaqyramyz.
QR Bilim jáne ǵylym ministri E. Saǵadiev sizdermen atalǵan basqosý aiasynda kezdesýge daiyn ekendigin jetkizemiz», - dep jazdy QR Bilim jáne ǵylym ministrliginiń baspasóz hatshysy Á. Álibekova.
Ult portaly
