Orys mektepterinde bilim alyp jatqan 500 myń balany qazaq tilinde sóiletetin jańa ádisteme jasaldy. Bul týraly búgin elordadaǵy №80 mektep-gimnaziiada ótken alǵashqy qońyraý aiasynda BAQ ókilderine suhbat bergen elimizdiń Bilim jáne ǵylym ministri Erlan Saǵadiev aitty, dep habarlaidy QazAqparat.
«Barlyqtaryńyz bilesizder, qazirgi ýaqytta jaǵdaiymyz jaman emes. Qazaq balalarynyń 90 paiyzy qazaq tilinde bilim alyp jatyr. Máselen, men oqyǵan ýaqytta Almaty qalasynda 65 mekteptiń bireýi ǵana qazaq tilinde bolatyn. Qazir qazaq balalarynyń 90 paiyzy ana tilinde bilim alýda. Demek shýlasaq ta, shýlamasaq ta ýaqyttyń ózi keledi», - dedi ol.
Osy rette Erlan Saǵadiev Bilim jáne ǵylym ministrligi airyqsha nazar aýdaratyny orys mektepterinde bilim alyp jatqan 500 myńǵa jýyq balany qazaq tiline úiretý ekendigin basa aitty.
«Olar 11 jyl oqysa da qazaq tilinde sóilemeidi, ádisteme nashar. Biz ony túsinip otyrmyz. Jańa ádisteme daiyn. Ilki joba retinde myńnan astam mektepke engizgeli otyr. Ol kommýnikativtik tehnologiia, sózdik qory minimým bolyp jasalǵan. Ilki joba óz nátijesin beretin bolsa, kelesi jyly mektepterge engizetin bolamyz», - dedi ministr.
