Búgin QR Bilim jáne ǵylym ministri Erlan Saǵadiev Almatyda bir top ziialy qaýymmen kezdesti, dep habarlaidy "Ult aqparat" ministrliktiń baspasóz qyzmetine silteme jasap.
"Kezdesý barysynda ministr jurtshylyqty alańdatqan saýal - mamandyqtar jikteýishine (klassifikatory) toqtaldy. Bul qujat 2011 jyldan bastap talqyǵa túsip jatqanyn eske salǵan Erlan Saǵadiev ministrlik mańyzdy qujattardy kópshilik talqysyna salmai engizbeitinin aitty. Sondai-aq bul saýal JOO rektorlary keńesinde talqylanyp jatqanyn atap ótti"deidi baspasóz ókilderi.
"Taǵy bir asa mańyzdy suraq, bul – 11-synyp oqýshylaryn himiia, fizika, biologiia pánderin aǵylshyn tilinde oqytý. «Bul máseleni talqylaýǵa bolady» degen ministr akademik ǵalymdar – Qazaqstannyń eńbek sińirgen qairatkeri, Memlekettik syilyqtyń iegeri, filologiia ǵylymynyń doktory Serik Qirabaev pen geografiia ǵylymynyń doktory, professor Áliia Beisenovamen kezdeskenin, sonda osy suraqty talqyǵa salǵandaryn aitqan.
«Álemde tehnikalyq ǵylym bir tilge kelip jatyr. Ózderińiz jaqsy bilesizder, burynyraqta Nemis klassikalyq Atom mektebi, Frantsýz ulttyq himiia mektebi, Orys iadrolyq mektebi boldy. Qazir olar joq. Germaniiada tehnikalyq salaǵa granttardy aǵylshyn tilinde qabyldaidy» degen Erlan Saǵadiev kúni keshe pedagogikalyq ujymmen kezdeskenin, sonda oqýshylardy joǵary synyptarda aǵylshyn tilinde oqytý máselesine toqtalǵandaryn aitady.
«Taiaýda Almaty, Shymkent, Taldyqorǵanda mektep direktorlary men muǵalimdermen kezdeskende olarǵa ata-ana balasyn joǵary synyptarda aǵylshyn tilinde oqytqysy kelmese, ózi sheshsin degen suraqty qoiǵan bolatynbyz, alaida, olardyń basym kópshiligi bulai etýge bolmaitynyn aitady. Pedagogtardyń sózinshe, bulai bolatyn bolsa, oqýshylar arasynda ózara bóliný bolýy múmkin. Talantty ne talantsyz degen sózder týyndaýy yqtimal. Sol sebepti de barlyǵyna birdei oqytqan jón. Onyń ústine ata-analardyń 80 paiyzy balalarynyń aǵylshyn tilinde bilim alýyn qalaidy. Ata-analardyń, ustazdardyń pikirlerine, ulttyq baǵdarlamaǵa júginip otyrmyz. Eshteńeni oidan qurastyryp otyrǵan joqpyz. Baǵdarlama 2019 jyldan bastalady. Oǵan deiin barlyǵyn baqylaýda ustaimyz. Eger basqa da pikirler bolatyn bolsa, ashyq talqylaýǵa daiynbyz. Múmkin Ulttyq ǵylym akademiiasy janynan osyndai qoǵamdyq suraqtardy talqylaý úshin organ qurarmyz» deidi Bilim jáne ǵylym ministri.
Sondai-aq kezdesý barysynda budan ózge de máseleler ortaǵa salynyp, ǵalymdar sóz sóiledi. Ómirdiń ózi qajet etip otyrǵan – oqýshylarǵa úsh tilde bilim berýde, eń bastysy, qazaq tiline basymdyq beriletini aitylǵan.
