Aýyl sharýashylyǵy ministrliginiń usynysymen aqpan-sáýir aralyǵynda sábiz eksportyna salynǵan tyiym toqtatyldy, dep habarlaidy QazAqparat.
«Sábiz eksportyna tyiym salyný birinshi kezekte atalǵan ónimmen ishki naryqty toltyrý, halyqty atalǵan ónimmen qoljetimdi baǵada qamtamasyz etý maqsatynda engizildi.
Bul rette, kókónis saqtaý qoimalaryna júrgizilgen skrining respýblikadaǵy sábizdiń qory 242,9 myń tonnany ekenin anyqtady. Onyń 70%-y jeke qosalqy sharýashylyqtardyń qolynda. Azyq-túlik taýarlarynyń ratsionaldy tutyný normalaryna sáikes, aqpan-sáýir ailarynda qazaqstandyqtarǵa 144,7 myń tonna sábiz qajet. Iaǵni, qamtamasyz etilý 241% degen sóz nemese 98,1 myń tonna sábiz artyq.
Osy jaity jáne sábiz saqtaýdyń ońtaily merziminiń qysqalyǵy eksporty tyiymyn joiýǵa múmkindik beredi», - dep jazylǵan ministrliktiń baspasóz qyzmeti usynǵan túsindirmede.
Ministrlik «Saryaǵash stantsiiasy» keden beketiniń qyzmetkerleriniń 40 vagon kartopty elden shyǵarmai ustaý faktisi týraly da málimet berdi.
«Bul partiianyń fitosanitarlyq sertifikattaryn tekserý kezinde QR Aýyl sharýashylyǵy ministrligi AÓK memlekettik inspektsiia komitetiniń memlekettik inspektorlary sábiz eksportyna tyiym engizilgenge deiin berilgeni anyqtaldy. Osyǵan bailanysty ministrlik atynan atalǵan taýarlardy áketýge eshqandai kedergiler bolmaǵan.
Iaǵni, bul taýarlar zańnama normalaryna sáikes bolǵandyqtan QR aýmaǵynan shyǵarylýy tiis edi. Osyǵan orai QR Qarjy ministrliginiń Memlekettik kirister komitetiniń aqparaty boiynsha qazirgi ýaqytta atalǵan kólemderdi Qazaqstan aýmaǵynan shyǵarý boiynsha sharalar qabyldandy», - delingen vedomstvo málimetinde.
