Grýziianyń burynǵy prezidenti, oppozitsiialyq "Biryńǵai ulttyq qozǵalys" partiiasynyń jetekshisi, Tbilisi sotynyń úkimimen alty jylǵa sottalǵan Mihail Saakashvili Grýziia men Resei shekarasyndaǵy jaǵdaiǵa jáne áskerge jaramdy Resei azamattarynyń jappai qashýyna bailanysty málimdeme jariialady, dep habarlaidy Azattyq.
Saakashvilidiń sózinshe, "áskerden qashqan reseilikterdiń jappai Grýziiaǵa kelgeni - Grýziia siiaqty kishkentai elge demografiialyq qaýip týǵyzady". Ol bir jaǵynan "áskerden qashqan reseilikterdi shekaradan ótkizgen Grýziia biliginiń sheshimin aiyptai almaitynyn, óitkeni áskerden qashqandar kóp bolǵan saiyn ýkraindar azyraq óletinin" aitqan.
Grýziiany 2004-2013 jyldary basqarǵan Saakashvili grýzin qoǵamyn "Reseiden qashyp kelgenderge basqynshy ekenin udaiy eske salyp turýǵa (Resei áskeri ózin táýelsiz dep jariialaǵan Abhaziia men Ońtústik Osetiiada tur) jáne Grýziianyń ishki saiasatyna kedergi jasamas úshin "olardyń grýzin pasportyn japai satyp alýyna jol bermeýge" shaqyrdy.
Saakashvili "grýzinderdiń áskerden qashqan reseilikterdi Túrkiia men ózge de elderge erterek ketýge barynsha májbúrleitinine" senimdi ekenin aitqan.
Saiasatker ózin sottaǵan sot otyrysynda "jańa bilik kelgende Resei azamattary Grýziiadan satyp alǵan barlyq páter dereý kámpeskelenetinin" málimdegen. Statistikaǵa qaraǵanda, Reseidiń 23 myńǵa jýyq azamaty Grýziiadan jyljymaityn múlik satyp alǵan. Onyń basym kópshiligi - keiingi alty aida Tbilisi men Batými qalalarynan satyp alǵandar.
Aita keteiik, Mihail Saakashvilidi Tbilisi soty "qyzmetin asyra paidalanǵany" úshin alty jylǵa sottaǵan. Onyń ústinen taǵy da úsh qylmystyq is qozǵalǵan. Grýziianyń úshinshi prezidenti qazir Tbilisidiń Vivamedi klinikasynda em alyp jatyr.
