Qazaqstannyń birinshi, álemniń 22-raketkasy Elena Rybakina Rolan Garros týrniriniń jartylai finalyna shyǵa almady, dep habarlaidy "Ult aqparat".
Qazaqstandyq tennisshi shirek finalda álemniń 32-raketkasy, reseilik Anastasiia Pavliýchenkovamen kezdesti.
Qarsylastar birge jattyǵyp, juptyq synda birge óner kórsetip júrgendikten, bir-biriniń syryn jaqsy biledi. Degenmen jekelei synda buǵan deiin joldary toqailaspaǵan eken.
Elena 21-de bolsa, 29 jastaǵy Anastasiia budan 10 jyl buryn Rolan Garros týrniriniń shirek finalyna deiin jetken edi.
Osy Frantsiia ashyq chempionaty barysynda reseilik tennisshi Belarýs eliniń qos myqtysy Arina Sobolenko men Viktoriia Azarenkony joldan taidyrdy.
Birinshi partiiada qazaqstandyq tennisshi 3:1 esebimen alǵa shyqqanymen, qarsylasy kóp uzamai tarazy basyn teńestirdi – 4:4. Tai-breikte Rybakina aiqyn basymdylyq kórsetti – 7:6 (7:2).
Esesine ekinshi sette Pavliýchenkova qarymta qaiyrdy – 6:2.
Úshinshi, sheshýshi partiiada Rybakina breik jasap, 3:2 esebimen alǵa shyqqanymen, Pavliýchenkova da qarap qalmady – 3:3. Esep 7:8 bolǵan mezette dop bergen Elena qatelik jiberdi – 7:9.
Tartysty ótken báseke 2 saǵat 33 minýtqa sozyldy.
Qarsylastar match barysynda bes-besten eis jasady.
Reseilik sportshy finalǵa shyǵý úshin dúniejúzilik reitingte 85-orynda turǵan sloveniialyq Tamara Zidanshekpen talasady. Ol jartylai finalda álemniń 35-raketkasy, ispaniialyq Paýla Badosany 7:5, 4:6, 8:6 esebimen utty.
E.Rybakina men A.Pavliýchenkova juptyq synda jartylai finalǵa shyǵý úshin Polsha ókili Magda Linett – amerikalyq Bernarda Peramen sheberlik baiqasady.
