قازاقستاننىڭ بٸرٸنشٸ, ەلەمنٸڭ 22-راكەتكاسى ەلەنا رىباكينا رولان گارروس تۋرنيرٸنٸڭ جارتىلاي فينالىنا شىعا المادى, دەپ حابارلايدى "ۇلت اقپارات".
قازاقستاندىق تەننيسشٸ شيرەك فينالدا ەلەمنٸڭ 32-راكەتكاسى, رەسەيلٸك اناستاسييا پاۆليۋچەنكوۆامەن كەزدەستٸ.
قارسىلاستار بٸرگە جاتتىعىپ, جۇپتىق سىندا بٸرگە ٶنەر كٶرسەتٸپ جٷرگەندٸكتەن, بٸر-بٸرٸنٸڭ سىرىن جاقسى بٸلەدٸ. دەگەنمەن جەكەلەي سىندا بۇعان دەيٸن جولدارى توقايلاسپاعان ەكەن.
ەلەنا 21-دە بولسا, 29 جاستاعى اناستاسييا بۇدان 10 جىل بۇرىن رولان گارروس تۋرنيرٸنٸڭ شيرەك فينالىنا دەيٸن جەتكەن ەدٸ.
وسى فرانتسييا اشىق چەمپيوناتى بارىسىندا رەسەيلٸك تەننيسشٸ بەلارۋس ەلٸنٸڭ قوس مىقتىسى ارينا سوبولەنكو مەن ۆيكتورييا ازارەنكونى جولدان تايدىردى.
بٸرٸنشٸ پارتييادا قازاقستاندىق تەننيسشٸ 3:1 ەسەبٸمەن العا شىققانىمەن, قارسىلاسى كٶپ ۇزاماي تارازى باسىن تەڭەستٸردٸ – 4:4. تاي-برەيكتە رىباكينا ايقىن باسىمدىلىق كٶرسەتتٸ – 7:6 (7:2).
ەسەسٸنە ەكٸنشٸ سەتتە پاۆليۋچەنكوۆا قارىمتا قايىردى – 6:2.
ٷشٸنشٸ, شەشۋشٸ پارتييادا رىباكينا برەيك جاساپ, 3:2 ەسەبٸمەن العا شىققانىمەن, پاۆليۋچەنكوۆا دا قاراپ قالمادى – 3:3. ەسەپ 7:8 بولعان مەزەتتە دوپ بەرگەن ەلەنا قاتەلٸك جٸبەردٸ – 7:9.
تارتىستى ٶتكەن بەسەكە 2 ساعات 33 مينۋتقا سوزىلدى.
قارسىلاستار ماتچ بارىسىندا بەس-بەستەن ەيس جاسادى.
رەسەيلٸك سپورتشى فينالعا شىعۋ ٷشٸن دٷنيەجٷزٸلٸك رەيتينگتە 85-ورىندا تۇرعان سلوۆەنييالىق تامارا زيدانشەكپەن تالاسادى. ول جارتىلاي فينالدا ەلەمنٸڭ 35-راكەتكاسى, يسپانييالىق پاۋلا بادوسانى 7:5, 4:6, 8:6 ەسەبٸمەن ۇتتى.
ە.رىباكينا مەن ا.پاۆليۋچەنكوۆا جۇپتىق سىندا جارتىلاي فينالعا شىعۋ ٷشٸن پولشا ٶكٸلٸ ماگدا لينەتت – امەريكالىق بەرناردا پەرامەن شەبەرلٸك بايقاسادى.
