Qazaqstannyń birinshi, álemniń 22-raketkasy Elena Rybakina Parijde ótip jatqan Rolan Garros týrniriniń úshinshi ainalymyna shyqty, dep habarlaidy "Ult aqparat".
Frantsiia ashyq chempionatynyń 21-raketkasy bolyp tirkelgen E.Rybakina ekinshi ainalymda dúniejúzilik reitingide 82-orynda turǵan japoniialyq Nao Hibinomen kezdesti.
Elena osy aida 22-ge tolatyn bolsa, qarsylasy 26 jasta edi.
Birinshi partiiany qazaqstandyq tennisshi breikpen bastap, 3:0 esebimen alǵa shyqty. Set bitkenshe, sol basymdylyǵyn saqtap qaldy – 6:3.
Ekinshi sette esep 1:1 bolǵan mezette E.Rybakina breik jasai aldy. Sodan keiin qarsylasyna birde-bir geim bergen joq – 6:1.
Báseke 1 saǵat 3 minýtqa sozyldy.
Osylaisha qazaqstandyq tennisshi óz sporttyq jolynda alǵash ret Rolan Garros týrniriniń úshinshi ainalymyna shyǵyp otyr. Ótken jyly ol ekinshi ainalymnan asa almaǵan edi.
E.Rybakina tórtinshi ainalymǵa shyǵý úshin 34 jastaǵy reseilik, reitingte 1096-satydaǵy Elena Vesninamen talasady. Sábili bolýyna bailanysty úzilisten keiin dodaǵa qosylǵan E.Vesnina úshinshi ainalymǵa oinamastan ótti. Onyń qarsylasy, álemniń 12-raketkasy, chehiialyq Petra Kvitova jýrnalisterge suhbat beremin dep júrip, aiaǵyn aýyrtyp alyp, kútpegen jerden jarys jolynan shyǵyp qaldy.
