Jeksenbi kúni tótenshe jaǵdaida Minskige qonǵan Ryanair kompaniiasynyń ushaǵy Vilniýske jetti. Bul týraly jýrnalisterge Litva syrtqy ister ministri Gabrieliýs Landsbergis habarlady. Ushaq bortynda 12 elden shamamen 170 jolaýshy bolǵan, dep jazady Azattyq.
Litva prezidenti Gitanas Naýseda Belarýs biliginen osy ushaqtan ustap áketilgen oppozitsiialyq belsendi Roman Protasevichti bosatýdy talap etti.
"NATO men Eýroodaqty belarýs rejiminiń halyqaralyq azamattyq aviatsiiaǵa tóndirip otyrǵan qoqan-loqysyna dereý reaktsiia tanytýǵa shaqyramyn. Halyqaralyq qaýymdastyq mundai nárse qaitalanbas úshin shuǵyl shara qoldanýy tiis" dedi Naýseda.
BBC saity Protasevichpen birge onyń qyzy 23 jastaǵy Sofiia Sapeganyń da ustalǵanyn jazdy. Ol Vilniýste magistratýrada oqidy.
"Interfaks" agenttigi Eýropa komissiiasynyń jetekshisi Ýrsýla fon der Liaienniń málimdemesinen úzindi keltiredi. "Barlyq jolaýshylarǵa Vilniýske jetýine jaǵdai jasalýy tiis. Olardyń qaýipsizdikterine kepildik berilýi tiis" dedi ol.
Eýrokomissiiasynyń jetekshisi halyqaralyq kez kelgen aviatasymaldaý erejesin buzý jazasyz qalmaidy dep eskertti. Eýroodaqtyń syrtqy saiasat jónindegi joǵarǵy ókili Jozep Borrel Twitter-de barlyq jolaýshylardyń qaýipsizdigine Belarýs biligi jaýap beredi dep jazdy.
Ryanair kompaniiasynyń ushaǵyna "qaýip tóngeni jaily" aqparatty lainer ekipajyna birinshi bolyp belarýs dispetcherleri habarlaǵan. Dál solar ekipajdy Minsk áýejaiyna qondyrýdy usynǵan. "Novaia gazeta" basylymyna bergen suhbatynda Ryanair ókili muny rastaǵan.
"Ushaq oidaǵydai qondy, jolaýshylar túsirildi, jergilikti qyzmet ushaqty tekserip shyqty. Eshteńe tabylǵan joq, shamamen eki saǵattan soń bilik [Vilniýske] ushyp ketýge ruqsat berdi" delingen kompaniia habarlamasynda.
Ryanair kompaniiasynyń aitýynsha, Minsk áýejaiynda ushaq shamamen bes saǵat turǵan.
"Nemis tolqyny" saity áleýmettik jeli qoldanýshylarynyń Ryanair kompaniiasyn synap, "diktator Lýkashenkoǵa járdemdeskeni úshin" kinálaǵanyn jazdy. Keibir qoldanýshylar oqiǵaǵa bailanysy halyqaralyq zertteýdi talap etken.
Irlandiialyq Ryanair aviatasymaldaýshy kompaniia – Eýropadaǵy eń iri biýdjettik áýe kompaniialarynyń biri.
Belarýs basshylyǵy ushaqty qondyrýdy Protasevichti qamaýmen bailanystyrmaidy. Al RT arnasynyń bas redaktory Margarita Simoniannyń aitýynsha, bul – Belarýs arnaiy qyzmetiniń júrgizgen operatsiiasy.
Afinydan ushyp shyǵar aldynda Protasevich áýejaida ózin áldebireý baqylap júrgenin, pasporty men basqa da qujattaryn sýretke túsirmek bolǵanyn eskertken.
- Roman Protasevich sońǵy kezderi "Belarýs golovnogo mozga" telegram-arnasyn júrgizip kelgen. Ol – Aleksandr Lýkashenkoǵa qarsy jappai narazalyq sherýlerinen habar taratqan NEXTA telegram-arnasynyń negizin qalaýshylardyń biri. Belarýs biligi bul arnany ekstremistik media dep sanaidy. Bilik Protasevichke halyqaralyq izdeý jariialap, ony "terrorister tizimine" qosqan. Ol birneshe jyl buryn qaýipsizdik maqsatynda Belarýsten ketip qalǵan.
- Keibir aqparat quraldary Protasevich ólim jazasyna kesilýi múmkin dep jazdy. Biraq qazirgi taǵylǵan aiyptarǵa qaraǵanda, ol 15 jylǵa deiin bas bostandyǵynan aiyrý jazasyna kesilýi múmkin.
