جەكسەنبٸ كٷنٸ تٶتەنشە جاعدايدا مينسكٸگە قونعان Ryanair كومپانيياسىنىڭ ۇشاعى ۆيلنيۋسكە جەتتٸ. بۇل تۋرالى جۋرناليستەرگە ليتۆا سىرتقى ٸستەر مينيسترٸ گابريەليۋس لاندسبەرگيس حابارلادى. ۇشاق بورتىندا 12 ەلدەن شامامەن 170 جولاۋشى بولعان, دەپ جازادى ازاتتىق.
ليتۆا پرەزيدەنتٸ گيتاناس ناۋسەدا بەلارۋس بيلٸگٸنەن وسى ۇشاقتان ۇستاپ ەكەتٸلگەن وپپوزيتسييالىق بەلسەندٸ رومان پروتاسەۆيچتٸ بوساتۋدى تالاپ ەتتٸ.
"ناتو مەن ەۋرووداقتى بەلارۋس رەجيمٸنٸڭ حالىقارالىق ازاماتتىق اۆياتسيياعا تٶندٸرٸپ وتىرعان قوقان-لوقىسىنا دەرەۋ رەاكتسييا تانىتۋعا شاقىرامىن. حالىقارالىق قاۋىمداستىق مۇنداي نەرسە قايتالانباس ٷشٸن شۇعىل شارا قولدانۋى تيٸس" دەدٸ ناۋسەدا.
BBC سايتى پروتاسەۆيچپەن بٸرگە ونىڭ قىزى 23 جاستاعى سوفييا ساپەگانىڭ دا ۇستالعانىن جازدى. ول ۆيلنيۋستە ماگيستراتۋرادا وقيدى.
"ينتەرفاكس" اگەنتتٸگٸ ەۋروپا كوميسسيياسىنىڭ جەتەكشٸسٸ ۋرسۋلا فون دەر ليايەننٸڭ مەلٸمدەمەسٸنەن ٷزٸندٸ كەلتٸرەدٸ. "بارلىق جولاۋشىلارعا ۆيلنيۋسكە جەتۋٸنە جاعداي جاسالۋى تيٸس. ولاردىڭ قاۋٸپسٸزدٸكتەرٸنە كەپٸلدٸك بەرٸلۋٸ تيٸس" دەدٸ ول.
ەۋروكوميسسيياسىنىڭ جەتەكشٸسٸ حالىقارالىق كەز كەلگەن اۆياتاسىمالداۋ ەرەجەسٸن بۇزۋ جازاسىز قالمايدى دەپ ەسكەرتتٸ. ەۋرووداقتىڭ سىرتقى ساياسات جٶنٸندەگٸ جوعارعى ٶكٸلٸ جوزەپ بوررەل Twitter-دە بارلىق جولاۋشىلاردىڭ قاۋٸپسٸزدٸگٸنە بەلارۋس بيلٸگٸ جاۋاپ بەرەدٸ دەپ جازدى.
Ryanair كومپانيياسىنىڭ ۇشاعىنا "قاۋٸپ تٶنگەنٸ جايلى" اقپاراتتى لاينەر ەكيپاجىنا بٸرٸنشٸ بولىپ بەلارۋس ديسپەتچەرلەرٸ حابارلاعان. دەل سولار ەكيپاجدى مينسك ەۋەجايىنا قوندىرۋدى ۇسىنعان. "نوۆايا گازەتا" باسىلىمىنا بەرگەن سۇحباتىندا Ryanair ٶكٸلٸ مۇنى راستاعان.
"ۇشاق ويداعىداي قوندى, جولاۋشىلار تٷسٸرٸلدٸ, جەرگٸلٸكتٸ قىزمەت ۇشاقتى تەكسەرٸپ شىقتى. ەشتەڭە تابىلعان جوق, شامامەن ەكٸ ساعاتتان سوڭ بيلٸك [ۆيلنيۋسكە] ۇشىپ كەتۋگە رۇقسات بەردٸ" دەلٸنگەن كومپانييا حابارلاماسىندا.
Ryanair كومپانيياسىنىڭ ايتۋىنشا, مينسك ەۋەجايىندا ۇشاق شامامەن بەس ساعات تۇرعان.
"نەمٸس تولقىنى" سايتى ەلەۋمەتتٸك جەلٸ قولدانۋشىلارىنىڭ Ryanair كومپانيياسىن سىناپ, "ديكتاتور لۋكاشەنكوعا جەردەمدەسكەنٸ ٷشٸن" كٸنەلاعانىن جازدى. كەيبٸر قولدانۋشىلار وقيعاعا بايلانىسى حالىقارالىق زەرتتەۋدٸ تالاپ ەتكەن.
يرلاندييالىق Ryanair اۆياتاسىمالداۋشى كومپانييا – ەۋروپاداعى ەڭ ٸرٸ بيۋدجەتتٸك ەۋە كومپانييالارىنىڭ بٸرٸ.
بەلارۋس باسشىلىعى ۇشاقتى قوندىرۋدى پروتاسەۆيچتٸ قاماۋمەن بايلانىستىرمايدى. ال RT ارناسىنىڭ باس رەداكتورى مارگاريتا سيمونياننىڭ ايتۋىنشا, بۇل – بەلارۋس ارنايى قىزمەتٸنٸڭ جٷرگٸزگەن وپەراتسيياسى.
افينىدان ۇشىپ شىعار الدىندا پروتاسەۆيچ ەۋەجايدا ٶزٸن ەلدەبٸرەۋ باقىلاپ جٷرگەنٸن, پاسپورتى مەن باسقا دا قۇجاتتارىن سۋرەتكە تٷسٸرمەك بولعانىن ەسكەرتكەن.
- رومان پروتاسەۆيچ سوڭعى كەزدەرٸ "بەلارۋس گولوۆنوگو موزگا" تەلەگرام-ارناسىن جٷرگٸزٸپ كەلگەن. ول – الەكساندر لۋكاشەنكوعا قارسى جاپپاي نارازالىق شەرۋلەرٸنەن حابار تاراتقان NEXTA تەلەگرام-ارناسىنىڭ نەگٸزٸن قالاۋشىلاردىڭ بٸرٸ. بەلارۋس بيلٸگٸ بۇل ارنانى ەكسترەميستٸك مەديا دەپ سانايدى. بيلٸك پروتاسەۆيچكە حالىقارالىق ٸزدەۋ جارييالاپ, ونى "تەرروريستەر تٸزٸمٸنە" قوسقان. ول بٸرنەشە جىل بۇرىن قاۋٸپسٸزدٸك ماقساتىندا بەلارۋستەن كەتٸپ قالعان.
- كەيبٸر اقپارات قۇرالدارى پروتاسەۆيچ ٶلٸم جازاسىنا كەسٸلۋٸ مٷمكٸن دەپ جازدى. بٸراق قازٸرگٸ تاعىلعان ايىپتارعا قاراعاندا, ول 15 جىلعا دەيٸن باس بوستاندىعىنان ايىرۋ جازاسىنا كەسٸلۋٸ مٷمكٸن.
