Qazaqstan jazýshylarynyń
ÚNDEÝI
El retinde irgesi bekip, álemdik moiyndalýdyń biigine kóterilgen Qazaq Eli óz damýynyń jańa kezeńine ótkeni – tarihi aqiqat.
Elbasy Nursultan Ábishuly Nazarbaev jyl basyndaǵy halyqqa Joldaýynda el tarihynyń jańa dáýiri bastalǵanyn aita kelip, Qazaqstannyń úshinshi jańǵyrýyn jariialaǵan bolatyn.
«Bolashaq baǵdar: Rýhani jańǵyrý» – Qazaqstan jurtshylyǵyna usynyp otyrǵan Qazaq Prezidentiniń jańa dáýir keńistigindegi el taǵdyryn anyqtap, memleketimizdiń damýyn tanýǵa, baǵyt-baǵdaryn belgileýge jańa keńistik ashar úshinshi jańǵyrý dáýiriniń irgeli tarihi qujaty ekenine kózimiz jete tústi.
Aitýly tarihi qujat negizinen jahandaný jaǵdaiynda ulttyq memleket qurýdyń syry men sipatyn jan-jaqty taldai otyryp, HHI ǵasyrdaǵy ulttyq sanany saqtaý men óristetýdiń naqty joldaryn usynady.
Elbasy arǵy-bergi dáýirler tájiribesi men memleket qurý úlgilerin saralai otyryp, jany, júregi, oilaý keńistigi álemdik básekelestik jaǵdaiynda ómir súrýge meilinshe beiim urpaq ósirip, ult tárbieleý qajettiligine aiyryqsha toqtalǵan. «Kún sanap ózgerip jatqan dúbirli dúniede sana-sezimimiz ben dúnietanymymyzǵa ábden sińip qalǵan taptaýryn qaǵidalardan arylmasaq kósh basyndaǵy eldermen terezemizdi teńep, iyq túiistirý múmkin emes. Ózgerý úshin ózimizdi myqtap qolǵa alyp, zaman aǵymyna ikemdelý arqyly jańa dáýirdiń jaǵymdy jaqtaryn boiǵa sińirýimiz kerek» - degen Elbasy ustanymy osy aitqanymyzdyń aiǵaǵy.
Bizder, qalamgerler qaýymy el erteńin anyqtaityn ult ómiriniń basty baǵdary – rýhani jańǵyrý degen Elbasy ustanymyn tolyǵymen qoldaimyz! Óitkeni, búgingi Qazaqstan – oń-solyn tarazylai otyryp, elikteý men solyqtaýǵa boi aldyrýdyń qanshama qaterli ekenin tolyq sezingen, ári Nursultan Nazarbaevtyń sózimen aitqanda, «HH ǵasyrdaǵy batystyq jańǵyrý úlgisiniń búgingi zamanynyń bolmysyna sai kelmeýiniń syryn» jan-dúniesimen uǵynǵan jańa turpatty el. Biz – óz áleýetimiz ben óz aqyl-oiymyzǵa, óz qabiletimizge senýdi ómirimizge serik etken jańa sipatty Táýelsiz Qazaqstandy ornyqtyrýshylarmyz.
Qoǵamnyń jaratylysy men tabiǵatyn «ulttyń rýhani kodyn» saqtai otyryp damytýǵa, ýaqyt talabyna sai baǵyttaýǵa jumyldyrý – birtutas ultty qalyptastyrýdyń úlgisi ekeni kúmánsiz. Elbasy usynyp otyrǵan san salaly, san sipatty damý men óristeýdiń joldary men mindetteri osynaý Uly Dala tósindegi jańa turpatty Qazaq Eliniń búgingi baianyn bekitip, erteńgi bolashaǵyn anyqtaýǵa jol ashary anyq. Ulttyq sanany damýdyń jańa satysyna kóterip, órkendeýdiń jańa keńistigine alyp shyǵar básekelik qabilet pen pragmatizm ulttyq biregeilikti saqtaý men bilimniń saltanat qurýyn, eldiń evoliýtsiialyq damýy men sananyń ashyqtyǵyn qamtamasyz eter taiaý jyldardyń El Prezidenti belgilegen alty mindeti – tamyryn tereńnen tartar, óz erteńin ózi órnekter Uly Dala memleketin Máńgilikke baǵyttary kúmánsiz.
Qazaq Eliniń keshegisin – búginge, búginin – bolashaqqa jalǵaýdy murat eter rýhani jańǵyrý haqyndaǵy Elbasy ustanymy, sóz joq, ult kósegesin kógertý men urpaq sanasyn tárbieleýdiń óristi, órkendi joly.
Qazaqstan Jazýshylar odaǵy
Basqarmasynyń sekretariaty.
