«Rýhani jańǵyrý» baǵdarlamasyna únemi damyp otyratyn úlken ideialyq tuǵyrnama dep qaraǵan jón. Bul týraly QR Aqparat jáne qoǵamdyq damý vitse-ministri Bolat Tilepov aitty, dep habarlaidy QazAqparat.
«Osydan úsh jyl buryn elimizdiń ideologiialyq qazanyn toltyrýǵa úmit syilaǵan úlken bastama qolǵa alynǵan bolatyn. «Rýhani jańǵyrý» degen atpen bastalǵan baǵdarlama biyl mine ,jańa kezeńge aiaq basyp otyr. Árine, ulttyq rýhtyń qaita túleýi elimizde búgin bastalǵan joq», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń dereginshe, buǵan deiin 2004 jyly «Mádeni mura», 2010 jyly «Halyq tarih tolqynda» degen baǵdarlamalar boldy. Olar óziniń negizgi missiiasyn oidaǵydai oryndap, halqymyzdyń tarihi, mádeni mirasyn qaita jańǵyrtty.
«Al, endi, búgingi rýhani jańǵyrýdyń basty maqsaty - bul qoǵamdyq sana. Al basty sharty - ulttyq kodty saqtaý. Kórip-bilip otyrsyzdar, álem kún saiyn ózgerip jatyr. Aityp kelmegen indettiń ózi adamdardyń ómir saltyn ǵana emes, tutastai memleketterdiń saiasatyn ózgertýde. Birinshi kezekke qazirgi tańda eldiń densaýlyǵy, tán saýlyǵy ǵana emes, jan saýlyǵy, iaǵni rýhani kúshi, saýaty men tálim-tárbiesi shyǵyp otyr. Munyń barlyǵy bir kúnde ne bir jylda bola salatyn dúnie emes. Óitkeni, adamnyń tánin emdeý qiyn bolsa, al janyn emdeý qiynnyń qiyny. Sondyqtan qoǵamnyń rýhani jańǵyrý máselesine belgili bir merzimdi baǵdarlama emes, únemi damyp, tolyqtyrylyp otyratyn úlken ideialyq tuǵyrnama dep qaraǵan jón», - dedi Bolat Tilepov.
.jpeg)