Qazaqstan boiynsha "Rýhani jańǵyrý" baǵdarlamasy zaman talabyna sai ózgertiletin boldy. Bul týraly Qazaqstan aqparat jáne qoǵamdyq damý vitse-ministri Bolat Tilepov málimdedi, - dep habarlaidy «Ult» portaly.
Onyń aitýynsha, rýhani jańǵyrý – sanany jańǵyrtý, al ol úshin sanamyzdaǵy paidasyz qaǵidattar men qajetsiz ádetterden, til men dildiń qadirsizdiginen arylý qajet. Ony oryndamaǵan jaǵdaida órkenieti damyǵan elderdiń arasynda bolýymyz eki talai.
«Sondyqtan búgingi tańda aqparat jáne qoǵamdyq damý ministrliginiń aldynda «Rýhani jańǵyrý» baǵdarlamasyn jańa jaǵdaiǵa beiimdeitin birqatar mindet tur», - dedi Tilepov.
Onyń aitýynsha, birneshe arnaiy jobanyń nobaiy ázirlendi. Ol ulttyq erekshelikti saqtaý otyryp ázirlenetin bolady. Soǵan sáikes, qazaqstandyqtar da qazirgi zamannyń synyna tótep bere alatyndai bolýy kerek. Ministrlik ókili baǵdarlama aiasynda osy baǵytta, jeke kásibi qabiletti damytýǵa baǵyttalǵan is-sharalarǵa basymdyq beriletinin habarlady.
Qazirdiń ózinde ministrlik jobanyń birqatar nusqasyn ázirledi. Barlyǵy jastardyń bolashaǵy, kásibi jaǵynan damýyna baǵyttalǵan. Eń aldymen dástúrdi nasihattaýǵa arnalǵan «Dástúr men ǵuryp» jobasy. Al «Quqyqtyq mádeniet» jobasy aiasynda eldiń quqyqtyq mádenietin damytýǵa arnalǵan is-sharalar toptamasy iske asyrylady. Taǵy bir joba - «Eńbek eldiń muraty», onyń aiasynda atqarylatyn jumystar ataýynan áldeqaida aýqymdy bolǵaly tur. Mysaly, bul joba aiasyna jastardyń minez-qulqyn qalyptastyrý, densaýlyqqa qatysty salaýatty ómir salty mádenieti men estetikalyq talǵamǵa baýlý kiredi.
Aita keteiik, 2020 jyly memleket basshysy mektepter men joǵary oqý oryndaryna qoǵamnyń ekologiialyq saýatyn ashý jáne ekomádenietin kóterý máselesin qosýdy aityp keledi. Osy baǵdarlama aiasynda jańa jobalarda osy máseleler boi kórsetetin bolady.
Sonymen qatar «Kitapsúier ult» uranyn paidalanyp, baǵdarlama aiasynda mektep oqýshylaryn, balalardy kitap oqýǵa baýlý boiynsha jumystar júrgiziledi.
Aita keteiik, Qazaqstanda «Rýhani jańǵyrý» baǵdarlamasyna jumsalatyn shyǵyndardy qysqartý josparlanyp otyr. 2017 jyly Elbasy Nursultan Nazarbaev usynǵan baǵdarlamanyń iske qosylýynyń basynda respýblikalyq biýdjetten 4,2milliard teńge (12,5 million dollar) bólindi.
Baǵdarlamany júzege asyrýǵa jaýap beretin ministrlikter ózine qajetti sommany aldy, sonyń ishinde Qazaqstannyń Aqparat jáne qoǵamdyq damý ministrligine ótken jyly 531million teńge bólindi. Al 2020 jyly shyǵyndar eki ese azaidy. Sebebi qazir karantinge bailanysty is-sharanyń basym bóligi onlain formatqa aýysty, soǵan sáikes qarjylandyrý da eki ese qysqardy.
Endi Aqparat jáne qoǵamdyq damý ministrligi eki baǵyt boiynsha jumys isteitin bolady. Onyń biri – aqparattyq jumys. Ekinshisi - osy baǵdarlamany ǵylymi-ádistemelik súiemeldeýdi qamtamasyz etetin qazaqstandyq qoǵamdyq damý institýtynyń qyzmetin qamtamasyz etý.
Aita keteiik, 2020 jyly baǵdarlamany iske asyrý úshin aqparat ministrligine 277 million teńge bólindi.
