Tanymal ánshi Roza Álqoja jas bosanǵan áielge kórsetiletin kútim týraly aityp, óziniń bes balasyn dúniege ákelgennen keiin arnaiy kútinbegenin jetkizdi, dep habarlaidy ult.kz.

Óner iesiniń sózinshe, kezinde enesi bosanǵannan keiingi kútimdi bilmeitinin jáne ózine de mundai qamqorlyq kórsetilmegenin aitqan. Roza Álqoja muny qalypty qabyldap, bes balasynyń árqaisysyn dúniege ákelgennen keiin kóp uzamai úi sharýasy men kúndelikti tirligine qaita kirisken.

Alaida ánshi bul tájiribeni kelinine qaitalamaýdy jón kórgen. Kelini sábi súigen kezde onyń tynyǵyp, kúsh jinaýyna jaǵdai jasap, úi sharýasyn óz moinyna alǵan. Ánshi sol ýaqytta úi jinap, ydys jýyp, tamaq ázirleý sekildi jumystardy ózi atqarǵanyn aitty.

Roza Álqojanyń pikirinshe, jas bosanǵan áielge qamqorlyq kórsetý mańyzdy. Ol kelinine tek otbasynyń bir múshesi retinde emes, óz urpaǵynyń anasy retinde qaraitynyn jetkizdi.

Sondai-aq óner iesi mundai kútimdi kez kelgen adam úirene alatynyn aityp, otbasyndaǵy burynǵy qalyptasqan ádetti jalǵastyrmai, ózgeristi ózinen bastaýdy tańdaǵanyn atap ótti.

Aita keteiik, Roza Álqoja qarjylyq jaǵdaiy týraly ashyq aitty. 

https://ult.kz/kz/post/kop-otirik-aitamyz-roza-alqoza-qarzylyq-zagdaiy-turaly-asyq-aitty

Roza Álqoja kim?

Roza Álqoja - qazaq estradasynyń tanymal ánshisi, aqyn ári kompozitor. Ol 1981 jylǵy 1 qazanda dúniege kelgen. Ál-Farabi atyndaǵy Qazaq ulttyq ýniversitetiniń jýrnalistika fakýltetin támamdap, eńbek jolyn “Aq jol – Qazaqstan” gazetiniń óner bóliminde bastaǵan. Keiin kásibi ónerge bet burdy.

2008 jyly “Men syiǵa tartqan oramal” atty alǵashqy albomyn shyǵardy. Onyń “Jylatqanyń netkeniń”, “Qara kúz”, “Júrek nazy”, “Án salshy, Roza”, “Myna ómir ǵajap qandai” sekildi ánderi kópshilikke keńinen tanylǵan. Roza Álqoja oryndaýshylyqpen qatar án jazýmen de ainalysyp, birqatar qazaqstandyq ónerpazdarǵa shyǵarmalar jazǵan.

Ánshi jýrnalist Aidyn Qabamen otbasyn qurǵan, bes balanyń anasy. Sondai-aq tanymal ánshi Ábdijappar Álqoja — onyń týǵan inisi.