Qazaqstan Respýblikasy Premer-Ministriniń Birinshi orynbasary Roman Skliar Germaniianyń iri kompaniialarynyń basshylarymen onlain-keńes ótkizdi, dep habarlaidy "Ult aqparat" Úkimettiń resmi saityna silteme jasap.
Is-shara Qazaqstan-Germaniia saýda-ekonomikalyq jáne investitsiialyq yntymaqtastyǵyn tereńdetý, «jasyl ekonomikany» damytý, birlesken jobalardy júzege asyrý, sondai-aq nemis investorlarynyń quqyqtaryn qorǵaý sharalaryna arnaldy.
Onlain kezdesýge nemis kompaniialarynyń jáne olardyń Qazaqstandaǵy filialdarynyń, sonyń ishinde Svevind Group, Volkswagen, Siemens, Deutsche Bank, Knauf, Deutsche Bahn AG jáne t. b. 90-ǵa jýyq basshylary men qyzmetkerleri qatysty. Sonymen qatar is-sharaǵa Germaniia Federativtik Respýblikasynyń Qazaqstandaǵy elshisi M. Iversen, Germaniianyń federaldy memlekettik organdarynyń, salalyq jáne aimaqtyq biznes qaýymdastyqtarynyń ókilderi qatysty.
Roman Skliar óz sózinde Germaniiadan kelgen seriktesterdi Qazaqstandaǵy qazirgi qoǵamdyq-saiasi jáne áleýmettik-ekonomikalyq jaǵdai, sondai-aq Qazaqstan Respýblikasynyń Prezidenti Q. Toqaevtyń bastamalary men Úkimetiniń sharalary týraly habardar etti. Qazaqstan Respýblikasy turaqty ekonomikalyq ósýdi, halyqtyń ál-aýqatyn qamtamasyz etý jáne investorlardyń quqyqtaryn qorǵaý basty nazarda ekenin atap ótti.
Ol Qazaqstan úshin sheteldik áriptestermen yntymaqtastyq erekshe mańyzdy ekenin atap ótip, nemis seriktesterin barlyq mindettemeler men kepildikter múltiksiz jáne tolyq kólemde oryndalatynyna sendirdi.
Nemis biznesiniń ókilderi ESG talaptarynyń artýy, jahandyq energetikalyq jáne tehnologiialyq aýysý jaǵdaiynda Qazaqstannyń investitsiialyq tartymdylyǵyn arttyrý úshin jańa Investitsiialyq saiasat tujyrymdamasyn ázirleý týraly habardar boldy.
Óz kezeginde WILO SE prezidenti jáne basqarma tóraǵasy, Germaniia ekonomikasynyń Shyǵys komitetiniń tóraǵasy O. Germes Germaniianyń aimaqtaǵy basty seriktesi Qazaqstanmen yntymaqtastyqtyń mańyzdylyǵyna toqtaldy. Onyń aitýynsha eldiń turaqty energiia óndirýge úlken áleýeti bar jáne Germaniia úshin qalaýly seriktes bolyp tabylady. Osy turǵyda ol nemis biznes-qaýymdastyǵy Qazaqstan Prezidentiniń bastamalaryn qoldaitynyn jáne elimizdiń damýyna úles qosatynyn basa aitty. Oliver Germes sondai-aq osy jyldyń mamyr aiynda nemis biznes-delegatsiiasymen Qazaqstanǵa iskerlik saparmen kelýge nietti ekenin málimdedi.
Sondai-aq nemis biznesiniń ókilderi sońǵy oqiǵalardyń Qazaqstandaǵy kompaniialardyń aǵymdaǵy jáne bolashaqtaǵy investitsiialyq josparlaryna áser etpegenin atap ótip, investitsiialyq ahýaldy jaqsartý boiynsha júrgizilip jatqan saiasatty qoldaitynyn bildirdi.
Elshi M. Iversen, sondai-aq CLAAS, Deutsche Bahn jáne Svevind Energy basshylary da el basshylyǵynyń jaǵdaidy turaqtandyrý jáne azamattardyń ál-aýqatyn jaqsartý boiynsha qabyldap jatqan sharalaryn qoldady. Olar Qazaqstan Respýblikasymen birlesken jobalardy júzege asyrý boiynsha yntymaqtastyqty jalǵastyratyndaryn aitty.
Sońynda «suraq-jaýap» formatynda pikirtalas ótip, qatysýshylar praktikalyq máselelerdi júzege asyrýdy talqylady.
