Qazaqstannyń investitsiialyq saiasatynyń jańa tujyrymdamasy ázirlenedi. Bul týraly QR Premer-Ministriniń birinshi orynbasary Roman Skliar aitty, dep habarlaidy QazAqparat.
«Qazaqstan saiasi jáne áleýmettik-ekonomikalyq ózgerister jolynda óz tarihynyń jańa paraǵyn ashady. Qazaqstan Prezidenti Qasym-Jomart Toqaev osy jyldyń naýryzynda «Jańa Qazaqstan» tujyrymdamasyn jariia etti. Atalǵan tujyrymdama qoǵamnyń barlyq ómirin qamtidy jáne zań shyǵarýshy bilik institýtyn nyǵaitýǵa, árbir Qazaqstan azamatynyń saiasi sheshimder qabyldaý protsesine qatysý múmkindigin keńeitýge baǵyttalǵan. Taiaýda jańa Úkimet jasaqtalyp, onyń aldyna áleýmettik-ekonomikalyq máselelerdi sheshý mindeti júkteldi. Sonymen qatar Qazaqstannyń investitsiialyq tartymdylyǵyn arttyrý úshin investitsiialyq saiasattyń jańa tujyrymdamasy ázirlenedi», - dedi Roman Skliar elordada ótip jatqan Qazaqstan-german biznes forýmynda.
Onyń atap ótýinshe, álemdik ekonomikadaǵy týrbýlenttilik jaǵdaida Qazaqstan men Germaniia arasyndaǵy ózara tiimdi yntymaqtastyqty damytý birinshi orynǵa shyǵady.
«Eki el ortaq qundylyqtardy bólisedi jáne beibitshilik pen turaqtylyqty nyǵaitýdy jaqtaidy. Qazaqstan tartymdylyqtyń úsh faktoryna ie: energiianyń ártaraptanǵan kózderi, logistika jáne mol tabiǵi resýrstar. Bizde jasyl energiia óndirisine jáne ony odan ary eksporttaýǵa mol áleýet bar. Qytaidan Eýropaǵa júk tasymaldaýda da elimizdiń tranzittik áleýeti arta túsedi», - dedi birinshi vitse-premer.
