«QazAvtoJoldyń» málimetinshe, 15 tamyzda saǵat 08:43-te Astana – Shýchinsk avtojolyndaǵy «Astana» aqy alý pýnktine kireberiste Toyota Land Cruiser Prado avtokóliginiń júrgizýshisi rólde uiyqtap ketip, apatqa ushyraǵan, dep habarlaidy ult.kz.
Saldarynan kólik basqarýdan shyǵyp, úshinshi jáne tórtinshi qozǵalys jolaqtarynyń arasyndaǵy jol infraqurylymy nysandaryna soǵylǵan.
Oqiǵa saldarynan zardap shekkender joq. Júrgizýshi kólikte jalǵyz bolǵan jáne meditsinalyq kómekten bas tartqan.
Soqtyǵysý saldarynan jol belgisi, jolaqtardy bóletin qorǵanysh býferi jáne beton blok zaqymdanǵan.
Jaýapty kompaniia júrgizýshilerge jol ústinde uiqy qyssa, qaýipsiz jerge toqtap, tynyǵyp alý qajet ekendigin eskertedi.
«Róldegi birneshe sekýndtyq uiqy adam ómirine qaýip tóndirýi múmkin. Sharshaý júrgizýshiniń zeiinin tómendetip, áreket etý jyldamdyǵyn báseńdetedi. Eger jol ústinde uiqy qysyp, kózińiz aýyrlap nemese nazaryńyzdyń tómendegenin sezseńiz, mejeli jerge «az qaldy» dep táýekel etpeńiz. Qaýipsiz jerge toqtap, mindetti túrde tynyǵyp alyńyz», - delingen málimette.
