Qyzylordalyq jas kásipker Serikbol Eraliev «Smart Generation» robototehnika mektebin ashty. Bul týraly óńirlik kásipkerler palatasynyń baspasóz qyzmeti habarlady.
Kásipkerlikpen ainalyspas buryn ol qalalyq qosymsha bilim berý oqý-ádistemelik ortalyǵynyń robototehnika úiirmesine jetekshilik etip keldi. Mektep ashýǵa 2,4 mln teńge qarjy jumsalǵan. Onyń 500 myńyn «Samruk-Kazyna Trust» áleýmettik jobalardy damytý qory uiymdastyrǵan baiqaýda jeńip alǵan.
Robototehnika mektebindegi sabaqqa jasy 6-ǵa tolǵan balalardan bastap kez kelgen niet bildirýshi jastar qatysa alady. Mektep aqyly negizde. Múmkindigi shekteýli balalar úshin tegin. Sabaqqa qatysýshylar aptasyna 4 saǵattan oqidy.
– Mektepti ashý qazirgi zamannyń talabynan týyndady. Búginde robototehnika salasy óte qarqyndy damyp kele jatyr. Aqparattyq tehnika salasynyń mamandary zor suranysqa ie. Al olardy qalai daiyndaimyz? Másele osynda. Mamandardy qazirden bastap tárbieleýdi qolǵa alǵandy jón sanadyq. Qajet qural-jabdyqtardy ár elden jinaqtadyq. Máselen, keibir quraldar Daniiadan aldyryldy, endi birin Resei, Qytai, Almaty, Astanadan jetkizdik. Mektepti ashqannan keiin jumystyń keshendi bolǵany jón. Sondyqtan materialdyq bazanyń tolyqtyǵyna kóńil bóldik, – deidi jas kásipker.
Serikbol aiyna bir ret mektepte oqityn balalardyń basyn qosyp, shara ótkizýdi oiǵa alyp otyr. Ol bul qadamyn tehnikaǵa áýes balalardyń momyn, tomaǵa-tuiyq bolatynymen, al kópshilik sharalar olardyń minezin ashýǵa kómektesetinimen bailanystyrady.
Mekteptiń ashylý rásimine qatysqan óńirlik kásipkerler palatasynyń direktory Ǵalymbek Jaqsylyqov:
– Qazirgi tsifrlanǵan qoǵamdy aqparattyq tehnologiia mamandarynsyz elestetý qiyn. Al mundai mamandardyń jastardy oqytýǵa den qoiǵany – qoldaýǵa turarlyq bastama. Serikbolmen kóktemde tanystym. Sol kezde qalada robototehnika mektebin ashqysy keletinin aitty. Innovatsiialyq jobalar baiqaýyna qatysyp kórgen, biraq jeńiske jete almady. Degenmen, oǵan eshteńege qaramastan isti bastaýǵa keńes bergen edim. Serikbol sózinde turdy. Bastamasyna, alǵashqy qadamyna qarap súisinip otyrmyn. Áriptesime sáttilik tiledim. Biz de óz tarapymyzdan qarap qalmaimyz. Qoldan kelgenshe kómek beremiz, – dedi.
Qazirdiń ózinde mektep ashylatynyn estigen 10-nan astam bala oqýǵa jazylǵan.
