Belgili aitysker aqyn Rinat Zaiytov Almatydaǵy «Alataý» dástúrli óner teatrynyń direktory qyzmetine taǵaiyndalǵannan keiin alǵash ret laýazymyna qatysty pikir bildirdi, – dep habarlaidy «Ult aqparat».
«Qadirli aǵaiyn, búgin Alataý dástúrli óner teatryna qyzmetke taǵaiyndaldym. Jalǵan sóilep, aqtalýdan aýlaqpyn. Degenmen de qaida baryp, ne istesem de, barlyǵy áýeli Jaratýshy, sonan soń ómirlik tilekshim, saqtaýshym, janashyrym da Halyq bolǵandyqtan, bir aýyz túsindirip óteiin. Adam bir nársege qabiletti ekenin kórsetpeiinshe, eshkimge eshteńeni qur sózben dáleldei almaityny aidan anyq. Sondyqtan maǵan berilgen bul múmkindik birinshi kezekte ózime synaq.
Úsh júzge sóilep júrgen aqyndaryńyz eki júz adamdy jumyldyryp jumys istete almasa, onyń paidasy ne? Osy sózben kelisetin shyǵarsyzdar?
Ómirdegi eń úlken tilegim óz elimniń bir buryshynda qazaq ónerine adal qyzmet etý ǵana. Ony talai jerde aityp ta júrdim. Mine sol tilegimniń alǵashqy kúni búgin ótti. Quttyqtaý artyq. Sáttilik tileseńizder, alǵysym sheksiz. Almaty qalasynyń mádeniet basqarmasynyń basshylyǵyna senim bildirgenine kóp rahmet. Ázirge osylai…» dep jazdy aitysker aqyn Instagram jelisindegi paraqshasynda.
