© Photo : Pixabay / Thomas Hoang
Ridderde jylý elektr stantsiiasynda qysymy joǵary №6 qazandyq taǵy isten shyqty, dep habarlaidy Sputnik Qazaqstan agenttigi Noks.kz saityna silteme jasap.
Atalǵan qazandyq keshke keshke iske qosylǵan bolatyn.
Ridder turǵyndarynyń qýanyshy kópke sozylmady. 9 qarasha kúni keshke iske qosylǵan №6 qazandyq túnde qaita istemei qaldy. Tańǵa qarai ridderlikterdiń úii taǵy sýytyp ketti.
"Qurmetti turǵyndar! Túnde altynshy qazandyq jumys istep turdy. Temperatýra 65 gradýsqa jetti. Biraq túngi saǵat birde apatty jaǵdaiǵa bailanysty ol toqtatyldy", - dedi Ridder ákimi Dmitrii Gorkovoi.
Aitýynsha, qazirgi tańda ortasha qysymdy úsh qazandyq jumys istep tur. Temperatýra 56/43 gradýs shamasynda. Altynshy qazandyqty jóndeý jumystary bastaldy. Jóndeý aiaqtalǵan soń, ol iske qosylady.
Qala ákimi turǵyndardan bul jaǵdaiǵa túsinistikpen qaraýdy ótindi.
Buǵan deiin Ridder basshysy altynshy qazandyq iske qosylar aldynda JES-taǵy jabdyqtyń jai-kúii nashar, kez kelgen sátte isten shyǵýy múmkin ekenin eskertken bolatyn.
Eske salsaq, 5 qarasha keshke Ridder JES-te kúl shyǵarý júiesiniń sorǵysy isten shyqty. 1 qazandyq agregatynyń qosalqy jabdyǵy apatty jaǵdaida toqtatyldy. Sonyń saldarynan jylý júiesindegi sýdyń temperatýrasy +30 gradýsqa deiin tómendedi. Al qalypty temperatýra mólsheri +70 bolýy shart. Ridder qalasynda 22 myńnan astam abonent jylýsyz qaldy.
Apatty joiý úshin shuǵyl shtab quryldy. Oǵan oblys ákimi jetekshilik etti.
Jylý stantsiiasyndaǵy tótenshe jaǵdaiǵa bailanysty 7-11 qarasha aralyǵynda mektep oqýshylary qashyqtyqtan oqytý formatyna kóshirildi.
Shyǵys Qazaqstan oblysynyń ákimi Danial Ahmetov Ridder JEO-ny qalanyń kommýnaldyq menshigine qaitarý máselesi qarastyrylyp jatqanyn málimdedi.
