27 maýsym kúni Ridder qalalyq sotynda jasóspirimdi kóligimen qaǵyp óltirgen Ridder ákiminiń burynǵy orynbasary Baýyrjan Qurmanbaevtyń isine qatysty sot otyrysy jalǵasty, dep habarlaidy "Ult aqparat" Altaynews.kz saityna silteme jasap.
Jaryssózde prokýratýra taraby eks-sheneýnikti bes jylǵa bas bostandyǵynan aiyrýdy surady. Sebebi, aiyptalýshy Qurmanbaev memlekettik qyzmetker bolyp tabylady. Zań júzinde prokýror suratqan bes jyl - osy qylmys boiynsha jaza mólsheriniń eń joǵarǵy shegi.
26 maýsym kúni ótken sot barysynda kúdikti qaza bolǵan jigittiń áke-sheshesinen keshirim surap, barlyq artylyp otyrǵan kináni moiyndaǵan edi. Eks-sheneýnik sol kúni rýlde mas kúiinde bolǵanyn da rastady.
Esterińizge sala ketsek, biylǵy 15 sáýirde Ridderdegi Aidarhanov kóshesi, 8-úidiń tusynda qala ákiminiń orynbasary Baýyrjan Qurmanbaev 19 jastaǵy Evgenii Smolnikovty jeke kóligimen qaǵyp óltirgen bolatyn. Tergeý anyqtaǵandai, jol apaty kezinde kóliktiń jyldamdyǵy saǵatyna 88 shaqyrym bolǵan. Al onyń qanynan 0,8 promille mólsherinde alkogol anyqtaldy. Prokýratýra laýazymdy tulǵany óz áreketimen memlekettik organdardyń, biliktiń bedeline nuqsan keltirdi dep sanaidy.
Kúdiktiniń aitýynsha, qarańǵy mezgilde qarama-qarsy kele jatqan mashinanyń jaryǵy kózine shaǵylysyp, ol jol jiegin kórmei qalǵan. Soqqyny sezgennen keiin baryp tejegishke basqan. Belgili bolǵandai, BMV H5 kóligin Qurmanbaev oqiǵadan eki apta buryn ǵana satyp alǵan.
Buǵan deiin qaza bolǵan jigittiń ákesi Viktor Smolnikov balasynyń ólimine kináli sheneýnikti keshiretinin aityp, sottan ony bas bostandyǵynan aiyrmaýdy suraǵan edi. Al aiyptalýshy taraptyń qorǵaýshysy Baýyrjan Qurmanbaevtyń 20 jyldan astam ýaqyt memlekettik qyzmet atqarǵanyn, sondai-aq qatań jaza taǵaiyndaǵan jaǵdaida bir otbasynyń qaiǵysy ekinshi otbasynyń qaiǵysyna ulasatynyn alǵa tartty. Sonymen qatar, aiyptalýshynyń ákesi ókpeniń qaterli isigimen aýyratynyn da aityp, bas bostandyǵynan aiyrmaýdy surady. Sot otyrysyna Qurmanbaevtyń jubaiy da qatysyp, keshirim bergen Smolnikovtar otbasyna alǵysyn bildirip ótti. Aita ketsek, Qurmanbaevtyń 16 jastaǵy qyzy men 7 jastaǵy uly bar.
Sot úkimi búgin, 28 maýsym kúni tańerteń shyǵaryldy. Sot Baýyrjan Qurmanbaevqa bir jyl merzimge bas bostandyǵynan aiyrý jazasyn taǵaiyndady. Sondai-aq, ol 158 000 teńge kóleminde memlekettik saraptamalarǵa ketken sot shyǵyndaryn óteitin bolady. Jaza merzimi qamaýǵa alynǵan kúnnen bastap esepteledi, iaǵni 16 sáýirden. Burynǵy sheneýnik jazasyn qaýipsizdigi barynsha tómen mekemede óteidi.
Sot úkim jariialaǵan otyrysqa Evgeniidiń ákesi Viktor Smolnikov qatyspady. Ol ǵimarattyń syrtynda kútip júrdi. BAQ ókilderine sot úkimine qatysty pikir bildirýden bas tartty.
