Foto: TJM
Aqtaý mańynda apatqa ushyraǵan AZAL áýe kompaniiasynyń ushaǵyn reseilik "Pantsir-S" zenittik-zymyran kesheni atyp túsirgen. Bul týraly Ázerbaijan úkimetiniń ókiline silteme jasaǵan Reuters agenttigi habarlady.
Qazaqstannyń Kólik ministrligi osy apatqa qatysty aldyn ala tergeý esebin jariialap, ushaq fiýzeliajynda kóptegen tesikter men soqqy izderiniń bar ekeni kórsetilgen fotolardy usynǵan edi.
Ázerbaijan tarapy budan bólek sol kúni Groznyida "Kover" jospary engizilgenin, biraq dispetcher bul týraly lainer zaqym alǵannan keiin ǵana habarlaǵanyn málimdedi.
Alǵashqy derek boiynsha, Baký – Groznyi baǵytyndaǵy turaqty reis jasaityn ushaq ushýdy bastar sátten Groznyiǵa deiingi aralyqta tehnikalyq turǵyda jaramdy bolǵan. Eki qozǵaltqysh ta apat bolǵanǵa deiin aqaýsyz istegen.
Ushaq Resei Federatsiiasynyń áýe keńistiginde, sonyń ishinde Groznyi áýejaiy ústinde ushqan kezde GPS signalyn joǵaltyp alǵan.
Groznyi mańynda aýa raiy qolaisyz bolyp, ushaq ekinshi ainalymǵa qonýǵa múmkindigi bolmaǵan soń, kapitan Bakýǵa keri qaitýdy uiǵarǵan. Dál sol kezde CVR (Cockpit Voice Recorder) málimetteri eki syrtqy dybysty tirkegen, olardyń aralyǵy 24 sekýndty quraidy.
2024 jylǵy 25 jeltoqsanda Baký – Groznyi baǵytymen ushqan Embraer E190 ushaǵy Aqtaý qalasyna jaqyn jerde qulaǵan. Bortta 62 jolaýshy men 5 ekipaj múshesi bolǵan, 38 adam qaza taýyp, qalǵandary aman qalǵan.
Apattan keiin Ázerbaijan prezidenti Ilham Áliev ushaqty Groznyi ústinde jerden atyp túsirdi dep málimdep, ekipajdyń shuǵyl qonýǵa suranys bildirgenin, alaida Resei áýejailary bortty qabyldamaǵanyn aitty. Sóitip ushaq Kaspii teńizi arqyly Aqtaýǵa bet alǵan.
Oqiǵadan úsh kún ótken soń Resei prezidenti Vladimir Pýtin Ilham Álievke telefon shalyp, «Resei áýe keńistiginde bolǵan qaiǵyly oqiǵa úshin» keshirim surady. Al Áliev óz kezeginde Máskeýdi resmi túrde kinásin moiyndaýǵa shaqyrdy.
