Jeke balabaqshalar men memlekettik balabaqshalar pedagogtary arasynda áleýmettik teńsizdikke nege jol berilip otyr? Osy máseleni kótergen Parlament Májilisiniń depýtaty Fahriddin Qarataev Úkimet basshysyna depýtattyq saýal joldady, dep habarlaidy "Ult aqparat".
«Memlekettiń qoldaýynyń arqasynda respýblika boiynsha 2012 jyldan bastap kóptegen kásipker jekemenshik balabaqshalar ashýǵa bet burǵan bolatyn. Óz jumysyn bastaý úshin bankterden milliondaǵan teńge nesie alyp, ǵimarattardy jalǵa alyp, óz jumysyn bastap, balabaqshaǵa jyldar boiy bara almai, kezegin kútip júrgen myńdaǵan sábidiń, ata-analardyń áleýmettik problemalaryn sheship, balalardyń mektepke deiingi tárbiemen qamtylýyn joǵary deńgeige kóterýge qol jetkizdi. Alaida sol igi isti qolǵa alǵan kásipkerler qazir Úkimetten qoldaý taba almai, kóptegen balabaqshanyń jabylyp qalý qaýipi tónip tur», - deidi ol Úkimet basshysyna joldaǵan depýtattyq saýalynda.
Fahriddin Qarataevtyń aitýynsha, Bilim ministriniń 2017 jylǵy 27 qarashadaǵy №597 buiryǵyna sáikes 2018 jyldan bastap, jan basyna shaqqandaǵy qarjylandyrý mólsheri 28 280 teńge etip belgilengen. Respýblika boiynsha Almaty oblysynda 31 000 teńge, Aqtóbede - 28 800, Qaraǵandyda - 29 300, Shyǵys Qazaqstanda - 29 150, Tarazda - 29 344, Shymkent qalasynda - 28 350, Aqtaý qalasynda 28 350 teńge tólenýde.
«Al, Túrkistan oblysynda osy kúnge deiin respýblika boiynsha eń az mólsherde 20 988 teńge esebinen tólenýde. Sonyń ishinde Maqtaaral, Jetisai, Kentaý aýdandarynda 18 000-19 000 teńge. Aqmola oblysynyń Tselinograd, Býrabai, Zerendi aýdandarynda da 23 000-25 000 teńge aralyǵynda jáne Pavlodar qalasynda 20 246 teńge tólenýde. Otandyq kásipkerler tarapynan bul másele týraly 1 jyldan beri barlyq instantsiiaǵa hat joldanǵanymen, eshqandai oń sheshim tappady», - dedi ol.
Depýtat pedagogtardyń ailyq jalaqysy biyl 25 paiyzǵa kóterilgenin, Prezidenttiń biylǵy Joldaýynda kelesi jyly pedagogtardyń jalaqysyn taǵy da 25 paiyzǵa kóterýdi tapsyrǵanyn eske saldy.
«Sonda kásipkerler Memleket basshysynyń tapsyrmasyn qalai oryndaidy? Jeke balabaqshalar men memlekettik balabaqshalar pedagogtary arasynda áleýmettik teńsizdikke nelikten jol berilýde? Bul másele aldaǵy ýaqytta sheshimin tappasa respýblika boiynsha kóptegen balabaqshalar jabylyp, ata-analardyń áleýmettik máselesi sheshilmei qalatyny anyq. Sondyqtan da, Memleket basshysynyń 2020 jylǵy 1 qyrkúiektegi Joldaýy men Bilim jáne ǵylym ministriniń 2018 jylǵy 31 qazandaǵy №597, 598 buiryǵyna sáikes, barlyq oblystar boiynsha jan basyna qarjylandyrý mólsherin sáikestendirý qajet dep esepteimiz», - dedi Fahriddin Qarataev.
