Saýda jáne integratsiia ministri Baqyt Sultanov shekaralas eldermen saýdany damytý jospary jaily aityp berdi, dep habarlaidy "Ult aqparat".
«Elimizdiń syrtqy shekarasyndaǵy infraqurylymdy barynsha damytýdy kózdep otyrmyz. Sondai-aq, Memleket basshysynyń tapsyrmasyna sáikes, eksporttyq jáne tranzittik áleýetti kúsheitýge basa nazar aýdara otyryp, «Qorǵas» shekara mańy yntymaqtastyǵy ortalyǵy qyzmetin qaita kúsheitý jumysy júrgiziledi. Sondai-aq BQO jáne SQO aýmaǵynda, iaǵni Resei Federatsiiasymen shekarada osyndai saýda habtaryn qurý boiynsha jańa qosymsha bastamalarymyzdy iske asyrý máseleleri pysyqtalady» - dedi Baqyt Sultanov Saýda jáne integratsiia ministrliginiń alqa otyrysynda.
Ol úshin ministrdiń aitýynsha, qazaqstandyq taýar óndirýshiler jelisiniń integratsiiasyn aldymen jolǵa qoiyp alý kerek.
«Ekinshi baǵyt - shikizattyq emes eksport kólemin eki esege arttyrý. Biz aldaǵy bes jyl ishinde qosymsha eksporttaýshylar pýlyn qurýdy josparlap, qazirgi belsendi 600-ge deiingi jańa eksporttaýshylar jelisin qalyptastyrýdy kózdeimiz. Shikizattyq emes eksportty eki esege kóbeitý úshin tek jańa ónim emes, sonymen qatar jańa kásiporyndar da paida bolýy kerek», - dep qorytyndylady ministr.
