Reseimen shekaradaǵy 27 avtomobil ótkizý beketi qaita qurylady. Bul jaiynda QR Premer-Ministriniń Parlament depýtattary saýalyna bergen jaýabynda aitylǵan, dep habarlaidy "Ult aqparat".
«Resei Federatsiiasymen shekaradaǵy ótkizý beketteriniń infraqurylymyn damytý jáne tehnikalyq jabdyqtaý maqsatynda 2020-2025 jyldary aralyǵynda kezeń-kezeńimen 27 avtomobil ótkizý beketin qaita qurý josparlanǵan. Shekaranyń eki jaǵyndaǵy ótkizý beketterin de damytý úshin Qazaqstan Respýblikasynyń Indýstriia jáne infraqurylymdyq damý ministrligi men Resei Federatsiiasynyń Kólik ministrligi arasynda ótkizý beketteriniń jumysyn iske qosý boiynsha birlesken is-qimyl josparyna qol qoiylǵan», - dep atap ótedi Úkimet basshysy.
Premer-Ministrdiń atap ótinshe, atalǵan jospar aiasynda Qazaqstan tarapy Ótkizý beketterin qaita qurý jol kartasyn ázirlep qol qoiǵan. Atalǵan qujatta qaita qurýdy júzege asyrýdyń naqty merzimderi men kezeńderi aiqyndalǵan.
«Búgingi kúni atalǵan jol kartasy RF Kólik ministrligine qol qoiýǵa joldanǵan. Jol kartasyna sáikes, Resei tarapy «Saǵarshyn» ótkizý beketin qaita qurýdy 2020 jyly bastamaq. Resei tarapy atalǵan jol kartasyna qol qoiǵannan keiin barlyq jumys kózdelgen tártippen júzege asyrylatyn bolady», - dedi Asqar Mamin.
Aita keteiik, Májilis depýtattarynyń Úkimet basshysy atyna joldaǵan saýalynda Qazaqstan-Resei shekarasyndaǵy «Saǵarshyn-Jaisan» ótkizý beketiniń shekaralyq ótkelin keńeitý máselesi kóterilgen bolatyn.
