Batystyń ekonomikalyq jáne qarjy sanktsiialarynan tityqtaǵan Reseidegi týroperatorlar el azamattaryna Visa jáne Mastercard bank kartalaryn rásimdeý úshin Ózbekstanǵa týrpaket usynyp jatyr. Bul jóninde Azattyqtyń Ózbek qyzmeti habarlady.
Máskeý men Ekaterinbýrg qalalaryndaǵy týroperatorlardy biriktirgen reseilik Vedi Group týristik kompaniiasy Ózbekstanǵa úsh kúndik týr ashylǵanyn jariialady. Osy týrdy satyp alǵan reseilikter Visa nemese Mastercard bank kartalaryn Ózbekstanda rásimdei alady. Batys sanktsiialaryna bailanysty Resei turǵyndary qazir atalǵan kartalardy paidalana almai júr.
Vedi Group kompaniiasynyń bir qyzmetkeriniń habarlaýynsha, Ózbekstanda mundai kartalardy "Kapitalbankte" ashýǵa bolady, al bank esebin ashtyrý úshin reseilik pasport kórsetse jetip jatyr.
– Sapar 23 myń rýbl turady. VISA jáne Mastercard kartalaryn ashýǵa qajetti qujattar sonyń ishine kiredi. Kartalar Ózbekstanda "Kapitalbankte" ashylady. Onda sizdi ókilimiz kútip alady, ol qujattardy rásimdeýge kómektesedi. Ol úshin sizde reseilik pasport bolýy kerek. Karta ashtyrý úshin 80 myń sým (shamamen 7 dollar) tóleisiz. Kartany bir saǵatta ashyp beredi, – dedi týristik kompaniia qyzmetkeri.
6 naýryzǵa qaraǵan túni Visa jáne Mastercard tólem júieleri Reseidegi qyzmetin toqtatqanyn jariialady. Buǵan Reseidiń Ýkrainaǵa basyp kirýi sebep boldy. Endi reseilikter shetelde jáne sheteldiń internet-dúkenderinde bul kartalarmen tólem jasai almai qaldy. Onyń ústine, Google Pay jáne Apple Pay servisteri de reseilikterge qyzmet etpeidi.
"Kapitalbanktiń" Tashkenttegi ortalyq keńsesiniń qyzmetkeri Resei azamattary bankten esep ashyp, Visa jáne Mastercard kartalaryn rásimdei alatynyn rastady.
– Osy maqsatta Ózbekstanǵa arnaiy týr uiymdastyrylyp jatqanynan habarsyzbyz. Degenmen Resei azamattary bizdiń bankten esep ashyp, Visa jáne Mastercard kartalaryn ala alady dep senimmen aita alamyn. Biraq ol úshin reseilik tólqujat jetkiliksiz. Ózbekstanda ýaqytsha nemese turaqty tirkelgenińiz týraly anyqtama da qajet. Sonymen birge 80 myń sým tóleisiz. Buǵan qosa, ai saiyn klienttiń bank esebinde kem degende 500 dollar jatýy tiis, – dedi "Kapitalbank" qyzmetkeri.
Keibir memleketter, máselen, Grýziia rezident emesterge naýryz aiynda eldegi bankterden esepshot ashýǵa tyiym saldy. Al Armeniiadaǵy bankter alty aiǵa jalǵa alǵany týraly kelisim-shart talap etedi. Resei azamattary jii baratyn Túrkiia esepshot depozitine 5 myń dollar salýdy talap etedi. Ózbekstandaǵy bankterde osy tárizdes shekteýler engizgeni jóninde resmi málimet joq.
