Reseidiń Krasnoiarsk óńirindegi avtobólshekter qoimasynda órt kezinde joǵalyp ketken úsh órt sóndirýshi mert boldy, dep habarlaidy reseilik TASS agenttigi.
«Boljam boiynsha, olardyń ústine shatyr qulap, qaza tapqan», - dedi quqyq qorǵaý organdarynyń ókili.
Sondai-aq, ol ottegi ballondary 40 minýtqa eseptelgenin aitty. Al órt sóndirýshilermen bailanys bir saǵattan asa ýaqyt buryn úzilgen.
Reseilik BAQ buǵan deiin Krasnoiarskidegi avtobólshekter qoimasynda bolǵan órtti sóndirý kezinde úsh órt sóndirýshimen bailanystyń úzilgeni, olardy izdeý jalǵasyp jatqanyn habarlady.
Jedel qyzmet ókiliniń sózinshe, olar tútin basqan ǵimarat ishinde baǵytyn joǵaltyp alǵan tárizdi.
«Boljam boiynsha, qoimada joǵalyp ketken adamdardy izdeýge barǵan gaz-tútinnen qorǵaý qyzmetiniń úsh qyzmetkeri ǵimaratty qatty tútin basyp, eshteńe kórinbei qalǵandyqtan baǵytyn joǵaltyp alǵan. Sodan keiin olarda ottegi taýsylyp, ǵimarattyń shatyry qulap úsheýi de mert bolǵan», - dedi derekkóz.
TJM kýágerlerdiń sózin negizge ala otyryp, qoimada 1-2 adam bolýy múmkin ekenin aitty. Olardy izdeý úshin gaz-tútinnen qorǵaý qyzmetiniń bes toby jumyldyrylǵan. Birneshe ýaqyt ótken soń úsh adamnan quralǵan alǵashqy toppen bailanys úzildi.
Resei TJM bas basqarmasynyń óńirlik basshysy Igor Lisin jýrnalisterge órt sóndirý kúshi men quraldaryn arttyryp jatqanyn málimdedi.
«Qazirgi ýaqytta tilsiz jaýdy aýyzdyqtaýǵa 148 adam men 43 tehnika jumyldyryldy», -dedi ol.
