Qazaqtyń uly aqyny ári aǵartýshysy Abaidyń 175 jyldyq mereitoiyna orai 21 aqpanda Túmen oblysynyń Esil qalasynda qazaq tilin oqytatyn synyp ashylady. Synypqa Abai esimi berilmek, dep habarlaidy "Ult aqparat".
«Reseide, ásirese Túmen oblysynda turyp jatqan qazaqtar úshin Abai shyǵarmalary men murasy óte mańyzdy. Túmendik jastar úlkenderge, eńbekke qurmet kórsetý, otbasy men dástúrge qamqorlyqpen qaraý baǵytynda tálim-tárbie alyp jatyr. Buǵan qosa, Abaidyń uly – Áddirahmannyń 1886-1889 jyldary Túmendegi Aleksandrovsk ýchilishesinde bilim alýynyń da bizder úshin mańyzy óte joǵary. Ol Túmenge 18 jasynda kelgen. Tipti Abaidyń ózi de qalamyzǵa, balasyna kelip-ketýi múmkin. Qazir muraǵat materialdaryn zerdelep jatyrmyz», - dedi Reseidiń Túmen oblystyq qazaqtardyń ulttyq-mádeni avtonomiiasynyń tóraǵasy Esenǵali Ibraev.
Onyń atap ótýinshe, biyl Túmen oblystyq qazaqtardyń ulttyq-mádeni avtonomiiasy ótkizetin barlyq iri sharalar Abaidyń 175 jyldyq mereitoiyna arnalatyn bolady.
«Túmen oblysynda Abaidyń 175 jyldyq mereitoiy aiasynda qazaq mádeni kúnderi, Túmen oblysy qazaqtarynyń quryltaiy, qazaq shyǵarmashylyǵyna arnalǵan «Jas urpaq» II oblystyq balalar festival-konkýrsy ótkiziledi. Sonymen qatar uly aqynnyń shyǵarmalary men murasyn nasihattaýǵa arnalǵan «Abai oqýlary» uiymdastyrylady. Al 2020 jyldyń 21 aqpanynda, Halyqaralyq ana tili kúninde Abaidyń 175 jyldyq mereitoiynyń qurmetine orai Túmen oblysynyń Esil qalasynda qazaq tilin oqytatyn synyp ashýdy josparlap otyrmyz. Synyp qazaqtyń uly aqyny ári aǵartýshysy Abai esimimen atalatyn bolady», - dedi E. Ibraev.
Ol Túmen oblystyq qazaqtardyń ulttyq-mádeni avtonomiiasy óńirde buǵan deiin de oqýshylar men jastarǵa ana tilderin oqytatyn synyptardy uiymdastyrǵandyǵyn aitty.
«Bul Túmen oblysynda ashylǵan tórtinshi synyp bolmaq. Synyptar Túmen oblystyq qazaqtardyń ulttyq-mádeni avtonomiiasy bastamasymen jáne Túmen oblystyq úkimetiniń, jergilikti atqarýshy organdardyń qoldaýymen qurylyp jatyr. Aldaǵy mindet - balalardy ana tilderinde sóileýge jáne jazýǵa ǵana úiretip qoimai, týǵan halqynyń, onyń uly tulǵalarynyń tarihymen tanystyrý», - dedi E.Ibraev.
