Reseidiń Belgorod oblysynda temir jolǵa jaqyn mańǵa zymyran bólshekteriniń qulaýyna bailanysty Novyi Oskol aýdanynda poiyzdar ýaqytsha toqtady. Bul jóninde aimaq basshysy Viacheslav Gladkov Telegram-arnasynda habarlady, dep jazady Azattyq.
Gýbernatordyń sózine qaraǵanda, 14 qazanda tańerteń Novyi Oskol aýdanynda áýe shabýylynan qorǵaityn júie birneshe zymyrandy atyp túsirgen. Olardyń bólshekteri temir jol mańyndaǵy elektr júiesin búldirgen. Oqiǵadan eshkim zardap shekpegen.
Jýyrda Belgorod qalasynda zymyran bólshekteri nemese ushý apparatyn atyp túsirýdiń saldarynan turǵyn úiler búlingen. Qalada áýe shabýylynan qorǵaityn júie iske qosylǵan. Keiin taǵy bir atqylaýdyń saldarynan oq-dári qoimasynda jarylys bolǵan. Aimaq biligi oqiǵalardy Ýkraina jaǵynyń atqylaýymen bailanystyrdy.
Ýkraina jaǵy Belgorod qalasyndaǵy atqylaýlar týraly habarlamady. Ol tarap ádette Resei aýmaǵyn atqylaý yqtimaldyǵy týraly aqparattarǵa túsinikteme bermeidi.
Aita keteiik, soǵys bastalǵaly Belgorodta birneshe jarylys bolǵan. Solardyń birinde birneshe adam qaza bolǵan.
