Senbi, 1 qazanda Qazaqstan Premer-Ministri Álihan Smaiylov kóshi-qonnyń ózekti máseleleri boiynsha keńes ótkizdi, dep habarlaidy "Ult aqparat" Úkimettiń baspasóz qyzmetine silteme jasap.
Ishki ister ministri Marat Ahmetjanov 21-28 qyrkúiek aralyǵynda Resei Federatsiiasynan el aýmaǵyna kelgen migranttar qatarynyń ádettegiden 2-3 ese kóbeigenin aitty. Tek sońǵy eki kúnde bul elden kelýshiler sany edáýir tómendei bastaǵan (29 qyrkúiekte 22,5 myń adam kelse, 10,1 myń adam shyǵyp ketken; 30 qyrkúiekte – 14,9 myń adam/11,6myń adam). Eseptik kezeńde Resei Federatsiiasynyń 382 azamaty turaqty turý úshin jáne 64 azamaty QR azamattyǵyn alýǵa qujat tapsyrǵan.
Ministrdiń aitýynsha, búgingi kúni elimizdegi kriminogendik jaǵdai turaqty. Migranttar tarapynan Qazaqstan azamattaryna qatysty jasalǵan qylmystar tirkelmegen. Sonymen qatar IIM sheteldik azamattardyń qoǵamdyq qaýipsizdigin jáne zańdylyǵyn qamtamasyz etýdi baqylaýdy kúsheitti, atap aitqanda, adamdar kóp shoǵyrlanatyn jerlerde politsiia nariadtarynyń sany artty.
QR Ulttyq qaýipsizdik komiteti tóraǵasynyń orynbasary – Shekara qyzmetiniń direktory Erlan Aldajumanov tiisti infraqurylymy bar ótkizý pýnktterinde Qazaqstan azamattary, júk kóligi jáne sheteldikter úshin jeke jol jolaqtary bólingenin habarlady.
«Qazirgi kezde Qazaqstan azamattary úshin shekaradan ótý boiynsha problemalar joq», — dedi ol.
Premer-Ministr jekelegen ótkizý pýnktterinde áli de bolsa uzyn-sonar kezek baryn aitty.
«Reseidiń shekara qyzmetimen ózara is-qimyldy kúsheitý kerek, eki jaqtan da adamdar jinalyp qalmaýy úshin biryńǵai algoritm ázirleý qajet. Sebebi, bul biznes pen halyqtyń oryndy narazylyǵyn týdyrady», — dedi Álihan Smaiylov.
Sondai-aq ishki reister, avtomobil jáne temirjol tasymaly sanyn arttyrý boiynsha – indýstriia jáne infraqurylymdyq damý ministri Qaiyrbek Óskenbaev, HQKO jumysy boiynsha – tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, turǵyn úidi jalǵa alý kezinde azamattardyń quqyqtary men kepildikterin túsindirý boiynsha – ádilet ministri Qanat Mýsin baiandama jasady.
Batys Qazaqstan oblysynyń ákimi Ǵali Esqaliev, Soltústik Qazaqstan oblysy ákiminiń orynbasary Sátjan Ablaliev, Qostanai oblysy ákimniń orynbasary Erlan Spanov, Aqtóbe oblysy ákiminiń orynbasary Ermek Kenjehanuly óńirlerdegi jaǵdai týraly aityp berdi.
Baiandamalardy tyńdaǵan Premer-Ministr júk jáne jeńil kólikterdiń ótýin jedeldetý úshin júktemesi kóp shekaralyq ótkizý pýnktterin keńeitý jóninde sharalar qabyldaý qajettigin atap ótti.
Sondai-aq Álihan Smaiylov turǵyn úidi jalǵa alý kezinde azamattardyń quqyqtaryn túsindirý jumystaryn kúsheitýdi tapsyrdy.
«Bul migranttardyń aǵynyna ǵana qatysty emes, jalpy azamattarymyz óz quqyqtaryn bilýi kerek. Egov nemese kóp qoldanylatyn qosymshalar arqyly taraptardyń quqyqtary men mindetterin kórsetetin tiptik jalǵa alý shartyna tsifrlyq túrde qol qoiýǵa bolatyndai etip jasaý qajet. Bul eki jaqtyń da quqyqtaryn qorǵaýǵa múmkindik beredi», — dedi Álihan Smaiylov.
Keńesti qorytyndylai kele, Premer-Ministr memlekettik organdar men ákimdikterge kóshi-qon jaǵdaiyn retteý boiynsha keshendi jáne tiimdi sharalar qabyldaý qajettigin atap ótti.
«Birinshi kezekte qazaqstandyq azamattar úshin turaqty «jasyl dálizdi», sondai-aq tirkelmegen migranttardy anyqtaý úshin mobildi monitoringtik toptardyń jumysyn qamtamasyz etý qajet», — dedi Álihan Smaiylov.
