Reseidiń 33 qalasynda 9 qyrkúiekte ótken zeinetaqy reformasyna qarsylyq aktsiialarynda politsiia 839 adamdy ustady. Bul týraly "OVD-Info" saity habarlady. 839 adamnyń 324-i Sankt-Peterbýrgte tutqyndaldy. "Fontanka" saitynyń habarlaýynsha, bul qaladaǵy ustalǵandar sany 500 adamǵa jetýi múmkin. Ekaterinbýrgte 129 adam ustaldy. "OVD-Info" 829 adam - aty-jóni belgili bolǵan adamdar ekenin, alaida, "shyn máninde ustalǵandar sany budan kóp bolýy múmkindigin" habarlady.
Máskeýde 9 qyrkúiek kúni keshke árqily málimet boiynsha ondaǵan adamdy politsiia ustady. "Teatralnaia" metro stantsiiasynda politsiia sherýge shyqqandardy sabady.
Máskeý politsiiasy zeinetke shyǵý jasyn ulǵaitýǵa qarsy mitingige eki myń adam qatysqanyn aitady. Ózge málimetter boiynsha, Pýshkinsk alańynda ótken aktsiiaǵa bes myńǵa deiin adam qatysty. Demonstranttar Pýshkin eskertkishi aldyna "Zeinet" degen jazýy bar qaraly oqiǵaǵa arnalǵan gúl shoǵyn qoidy. Jinalǵandar "Bul reforma emes, tonaý!" jáne "Aqshamyzdy qaitaryńdar!" dep urandatty.
Oppozitsiialyq saiasatker Aleksei Navalnyidyń serigi Leonid Volkovtyń Twitter-de jazýynsha, Resei boiynsha zeinetaqy reformasyna qarsylyq aktsiialaryna 60 myńnan 80 myńǵa deiingi aralyqta adam qatysty. Volkov bilik ruqsat bermegen qarsylyq aktsiialaryna qatysqandar sanyn dál esepteýdiń qiyn ekenin aitady.
Shildede Resei parlamenti úkimettiń zeinetke shyǵý jasyn áielderge 63 jasqa, erlerge 65 jasqa deiin uzartý josparyn aldyn ala tyńdalymda maquldaǵan edi.
Budan soń ondaǵan qalada myńdaǵan azamat bul reformaǵa qarsy shyǵyp, jappai narazylyq aktsiialaryn ótkize bastaǵan. Qoǵamdyq saýalnama nátijeleri boiynsha, osynyń saldarynan Pýtinniń reitingi kúrt tómendegen. Pýtin buǵan jaýap retinde 29 tamyzda ótken tikelei efirde áielderdiń zeinetke shyǵý jasyn úkimet josparlaǵan segiz jyldyń ornyna bes jylǵa uzartýdy jáne úsh nemese odan da kóp balaly analardy zeinetke erterek shyǵarýdy usynǵan.
