Reseidiń TNT arnasy "Slýga naroda" ("Halyq qyzmetshisi") serialynyń alǵashqy epizodynan Prezident Vladimir Pýtin jaily qaljyńdy alyp tastady. Bul serialda basty keiipkerdi biyl kóktemde Ýkraina Prezidenti bolyp sailanǵan akter Vladimir Zelenskii somdaǵan. Bul aqparatty britandyq BBC telearnasynyń Orys qyzmeti habarlady.
Siýjet jelisi boiynsha, Zelenskii somdaǵan keiipker - Ýkraina prezidenti Goloborodko qymbat saǵat pen kostiým satyp alý úshin dúkenge keledi. Onyń kómekshisi oǵan "Vladimir Pýtin shveitsariialyq Hublot (bul sózdi "hýblo" dep aitady) saǵatyn taǵady" dep aitady. Al Goloborodko bolsa "Pýtin - hýblo ma?" dep suraidy. Kómekshisi "Iá" dep jaýap beredi.
Áleýmettik jeli qoldanýshylarynyń aitýynsha, Reseidiń Qiyr Shyǵysynda serialdy tolyq kórsetken, al Eýropa jaǵynda bul bóligin alyp tastaǵan. BBC telearnasynyń habarlaýynsha, Máskeýde kórsetilgen nusqasyna montaj jasalǵany bilingen. Telearna TNT arnasynan túsinikteme suraǵan.
9 jeltoqsanda Vladimir Pýtin men Vladimir Zelenskii Parijde alǵash ret kezdeskennen keiin Resei arnalarynan "Slýga naroda" serialyn kórsetetini jaily habar taraǵan. TNT arnasy jarnama rolikte Goloborodkony prezident Zelenskiimen salystyrǵan:
"Serialda ol eldiń ekonomikalyq jaǵdaiyn túzeidi. Al shynaiy ómirde she? Serialda ol jemqorlyqty jeńedi. Al shynaiy ómirde she? Serialda ol Eýroodaqqa qolyn bir silteidi. Al shynaiy ómirde she? Qysqasy, Zelenskii nusqasyn kórińiz".
* Vladimir Pýtinniń saǵaty týraly serialǵa mátin jazǵandar onyń Hublot saǵat taqqanyn eshqashan kórmegen.
