رەسەيدٸڭ تنت ارناسى "سلۋگا نارودا" ("حالىق قىزمەتشٸسٸ") سەريالىنىڭ العاشقى ەپيزودىنان پرەزيدەنت ۆلاديمير پۋتين جايلى قالجىڭدى الىپ تاستادى. بۇل سەريالدا باستى كەيٸپكەردٸ بيىل كٶكتەمدە ۋكراينا پرەزيدەنتٸ بولىپ سايلانعان اكتەر ۆلاديمير زەلەنسكيي سومداعان. بۇل اقپاراتتى بريتاندىق BBC تەلەارناسىنىڭ ورىس قىزمەتٸ حابارلادى.
سيۋجەت جەلٸسٸ بويىنشا, زەلەنسكيي سومداعان كەيٸپكەر - ۋكراينا پرەزيدەنتٸ گولوبورودكو قىمبات ساعات پەن كوستيۋم ساتىپ الۋ ٷشٸن دٷكەنگە كەلەدٸ. ونىڭ كٶمەكشٸسٸ وعان "ۆلاديمير پۋتين شۆەيتسارييالىق Hublot (بۇل سٶزدٸ "حۋبلو" دەپ ايتادى) ساعاتىن تاعادى" دەپ ايتادى. ال گولوبورودكو بولسا "پۋتين - حۋبلو ما?" دەپ سۇرايدى. كٶمەكشٸسٸ "يە" دەپ جاۋاپ بەرەدٸ.
ەلەۋمەتتٸك جەلٸ قولدانۋشىلارىنىڭ ايتۋىنشا, رەسەيدٸڭ قيىر شىعىسىندا سەريالدى تولىق كٶرسەتكەن, ال ەۋروپا جاعىندا بۇل بٶلٸگٸن الىپ تاستاعان. BBC تەلەارناسىنىڭ حابارلاۋىنشا, مەسكەۋدە كٶرسەتٸلگەن نۇسقاسىنا مونتاج جاسالعانى بٸلٸنگەن. تەلەارنا تنت ارناسىنان تٷسٸنٸكتەمە سۇراعان.
9 جەلتوقساندا ۆلاديمير پۋتين مەن ۆلاديمير زەلەنسكيي پاريجدە العاش رەت كەزدەسكەننەن كەيٸن رەسەي ارنالارىنان "سلۋگا نارودا" سەريالىن كٶرسەتەتٸنٸ جايلى حابار تاراعان. تنت ارناسى جارناما روليكتە گولوبورودكونى پرەزيدەنت زەلەنسكييمەن سالىستىرعان:
"سەريالدا ول ەلدٸڭ ەكونوميكالىق جاعدايىن تٷزەيدٸ. ال شىنايى ٶمٸردە شە? سەريالدا ول جەمقورلىقتى جەڭەدٸ. ال شىنايى ٶمٸردە شە? سەريالدا ول ەۋرووداققا قولىن بٸر سٸلتەيدٸ. ال شىنايى ٶمٸردە شە? قىسقاسى, زەلەنسكيي نۇسقاسىن كٶرٸڭٸز".
* ۆلاديمير پۋتيننٸڭ ساعاتى تۋرالى سەريالعا مەتٸن جازعاندار ونىڭ Hublot ساعات تاققانىن ەشقاشان كٶرمەگەن.
