Keshe Reseidiń Norilsk degen qalasyndaǵy taý shańǵysy kesheninde qar kóshkini júrip, 300 sharshy metr aýmaqty qar basyp qaldy, dep habarlaidy TASS agenttigi.
Qutqarýshylar qar astynan 15 jasar jasóspirimdi taýyp aldy, onyń súiekteri synǵan jáne denesi qatty muzdap qalǵan.
Jekemenshik týristik bazany basqaratyn kompaniianyń basqarma tóraǵasy Igor Shatalov eki adamnyń óz betinshe qar astynan aman-esen shyqqanyn habarlady.
Keiinnen qar astynan bir áieldiń denesi tabyldy.
Qutqarýshylar qar astynda qalǵan bir úishiktiń bóligin taýyp, arshýǵa kiristi. Ol úide 4 adamnan turatyn bir otbasy bolýy múmkin.
Jergilikti biliktiń málimetinshe, TJM qyzmetkerleri qar astyndaǵy adamdardyń qaida ekenin aldyn ala anyqtap alǵan. Qazir oqiǵa ornynda aýa raiy nasharlap ketti, sondyqtan adamdardy izdeý qiynǵa soǵyp tur.
Qar kóshkini bolǵan jerde 200 adam men 18 tehnika jumys istep jatyr.
RF Tergeý komiteti tótenshe oqiǵadan keiin qylmystyq is qozǵady.
Oqiǵa ornynda áli de qar kóshkininiń jalǵasý qaýpi bar.
