Máskeý ortalyǵynda túnde Navalnyi úkimine qarsylyq bildirgen manifestanttar men politsiia arasynda qaqtyǵys boldy, myńǵa jýyq adam ustaldy dep habarlady Azattyqtyń Orys qyzmeti. Dál osynyń aldynda Máskeýdiń Simonovskii soty oppozitsiialyq saiasatker Aleksei Navalnyidy túrmege qamaý týraly úkim shyǵarǵan. Oǵan 2014 jyly berilgen shartty jaza 3,5 jyl túrme jazasymen almastyryldy.
Peterbýrgte 221 adam ustalǵan. Ijevsk, Omby, Cheliabinsk, Ýfa, Kirov, Cheboksar, Mytishi, Krasnodar qalalarynda da ustaýlar bolǵan. OVD-Info málimeti boiynsha, Máskeý ýaqytymen túngi saǵat 2 shamasynda Reseide ustalǵandar sany 1200-den asqan.
Máskeýdegi Manej alańyna seisenbi kúni keshke Rosgvardiia men politsiia jasaqtary, arnaiy tehnika ákelindi. Pýshkin alańy tutas temir sharbaqtarmen qorshaldy. Jan jaǵynda politsiia turdy. Qala ortalyǵyndaǵy birneshe metro stantsiiasy jabyldy. Aýmaqta mobildi internet óshirildi.
Navalnyiǵa úkim shyqqannan keiin oppozitsiialyq saiasatkerdiń shtaby jaqtastaryn úkimge qarsylyq bildirý úshin Manej alańyna shyǵýǵa shaqyrdy. Narazylyqqa birneshe myń adamnyń shyqqany habarlandy. Qala ortalyǵynda kólikter signal berip júrgen.
Aleksei Navalnyi 2014 jyly birneshe ai úiqamaqta bolǵandyqtan, ol jalpy rejimdegi koloniiada 2 jyl 8 ai otyrady. Sotta taraptardyń úkimdi apelliatsiiaǵa bere alatyny aityldy.
- Navalnyi byltyr tamyzda Tomsk qalasynan Máskeýge ushyp bara jatqanda jaǵdaiy kúrt nasharlap, Omby qalasyndaǵy aýrýhanaǵa jetkizilgen. Keiin onyń ýlanǵany belgili bolǵan. Es-tússiz jatqan Navalnyi Germaniia biligi jibergen arnaiy ushaqpen Berlinge jetkizilip, sol jaqta birneshe ai emdeldi.
- Ol biyl 17 qańtarda Germaniiadan Reseige oralǵan edi. Resei politsiiasy Navalnyidy Máskeýdegi Sheremetevo áýejaiynan birden ustap áketken. Osy kúni politsiia Navalnyidy kútip alýǵa kelgen jetpiske jýyq adamdy ustady.
- 18 qańtarda Máskeýdegi sot Navalnyidy 30 kúnge qamaýǵa aldy. Sotqa deiin saiasatkerge advokaty jiberilmedi. Qorǵaýshylarǵa sot bolatyny jaily otyrys bastalar sátte habarlandy. Navalnyi bul jaitty "zańsyzdyqtyń shekten shyqqan sáti" dedi. Sotta IIM ókili Navalnyi shartty jazasy úshin politsiiaǵa birneshe ret belgilenbedi dedi.
- Navalnyi qamaýda otyrǵanda ol basqaratyn "Jemqorlyqpen kúres qory" "Pýtin saraiy" atty zertteýin jariialady. Zertteýde Resei prezidenti Pýtinniń Gelendjikte záýlim saraiy bary aitylady.
- 23 jáne 31 naýryzda Reseide myńdaǵan adam Navalnyidy bosatýdy talap etip narazylyqqa shyqty. Jurt eldegi jemqorlyqqa da qarsylyq bildirdi. 23 qańtardaǵy mitingide politsiia tórt myń adamdy, 31 qańtarda 5,3 myń adamdy ustady.
- Eki mitingiden keiin Resei biligi belsendilerge, quqyq qorǵaýshylarǵa, oppozitsonerlerge qarsy qyryqtai qylmystyq is qozǵady. Osy istiń aiasynda politsiia qylmystyq is qozǵalǵandardyń úiin tintip, keibirin qamaýǵa aldy.
- Eýroparlament pen AQSh Resei biliginen Navalnyidy bosatýdy talap etedi.
