Jyl basynan beri kólik politseileri qazaqstandyqtarǵa 95 mln teńgege jýyq aiyppul saldy, dep habarlaidy "Ult aqparat" kóliktegi politsiia departamentine silteme jasap.
«9-13 jeltoqsan aralyǵynda QR IIM Kóliktegi politsiia departamentiniń qyzmet kórsetetin ýchaskelerinde «Quqyqtyq tártip» jedel-profilaktikalyq is-sharasy ótip jatyr», – deidi departamenttiń ákimshilik politsiia basqarmasynyń bastyǵy Jasulan Baikenov.
J. Baikenovtiń aitýynsha, joǵaryda kórsetilgen is-sharanyń 3 kúni ishinde 18 qylmystyq quqyq buzý faktisi tirkeldi, onyń 13-i kezekshi táýlikte ashyldy. Sondai-aq buryn jasalǵan 4 qylmys ashyldy.
Is-shara barysynda kólik politseileri izdeýde júrgen 8 qylmyskerdi ustady. Kóliktegi PD izdestirip júrgen qylmyskerlerdiń ishinen TMD elderiniń quqyq qorǵaý organdary úshin – 3, QR aýmaqtyq IIO úshin – 4.
10 jeltoqsanda Kókshetaý stantsiiasyndaǵy jelilik politsiia bóliminiń qyzmetkerleri Resei Federatsiiasy QK 158-babynyń 2-bóliginde kózdelgen qylmysty jasaǵany úshin 47 jastaǵy Resei azamatshasyn ustady.
Sondai-aq, ártúrli ákimshilik quqyq buzýshylyqtar jasaǵany úshin 195 quqyqbuzýshy ákimshilik jaýapkershilikke tartyldy. Tyiym salynǵan zattardy zańsyz saqtaǵany jáne alyp júrgeni úshin 6 adam ustaldy.
Qazaqstan Respýblikasynda júrip-turý erejelerin buzǵany úshin 21 sheteldik ustalyp, ákimshilik jaýapkershilikke tartyldy, onyń 2-eýi alys shetelden kelgen (Kongo Respýblikasy jáne Germaniia).
Shara aiasynda kámeletke tolmaǵandar arasynda quqyq buzýdyń aldyn alý, olardyń quqyqtyq mádenietin arttyrý maqsatynda temirjol boiynyń tósemine jaqyn ornalasqan orta mektepterde profilaktikalyq dáris ótkizildi.
«Oqýshylarǵa QR Ákimshilik quqyq buzýshylyq týraly Kodeksiniń jáne Qylmystyq kodeksiniń baptary túsindirildi. Sondai-aq jasóspirimderge temir jol kóligi obektilerindegi júrip-turý erejeleri jetkizildi»,- dep túiindedi sózin politsiia podpolkovnigi.
Esterińizge sala keteiik, jyl basynan beri KPD qyzmetkerleri ártúrli ákimshilik quqyq buzýshylyqtar jasaǵany úshin 50 041 adamdy ákimshilik jaýapkershilikke tartty. Olarǵa 94 mln 969 626 teńge kóleminde ákimshilik aiyppul salyndy.
