Mamyr aiynda Reseige Úndistannan kelgen Ýlianov memlekettik ýniversitetiniń 16 stýdentinen koronavirýstyń úndistandyq shtamy (B.1.617) anyqtaldy. Bul týraly Rospotrebnadzordyń Ýlianov oblysy boiynsha basqarmasyna súiengen "Kommersant" basylymy jazdy.
"Stýdentter oqshaýlandy, olar Ýliandyqtarmen sóilesip te úlgermegen. Olardy jetkizgen eki júrgizýshi baqylaýǵa alyndy. Stýdentterge 14 kún boiy kóppen aralasýǵa tyiym salynǵan. Ońasha tamaqtanyp jatyr. Árqaisysyna meditsinalyq qyzmetker bekitilgen, kúnine eki ret dene qyzýy ólshenedi. Hostel jumysshylary olardyń kir-qońyn jýyp, bólmelerin tazalap, qyzmet kórsetedi" dedi Rospotrebnadzordyń bólim jetekshisi Diliara Hakimova.
Stýdenttermen aralasqan – shamamen 120 adam da eki aptaǵa oqshaýlanǵan, olar qashyqtan oqidy. Joǵary oqý ornynda sanitarlyq-epidemiologiialyq sharalary kúsheidi dep jazdy "Farmvestnik".
Hakimovanyń pikirinshe, virýs taralmas úshin qajetti barlyq shara jasalǵan. Federaldyq basshylyqqa da úndistandyq shtamm jaily aqparat jiberilgen.
Aimaq úkimeti úndistandyq shtamnyń anyqtalýyna bailanysty qosymsha profilaktikalyq sharalar qabyldanbaitynyn aitty.
"Rospotrebnadzor qabyldanǵan sharalar ázirge jetkilikti dep sanaidy. Qajet jaǵdaida bilik qosymsha shara qoldanady" dedi gýbernatordyń orynbasary Aleksandr Kostomarov.
- Koronavirýstyń úndistandyq shtamy SARS-CoV-2 virýsynyń tórtinshi nusqasy. Dúniejúzilik densaýlyq saqtaý uiymy ony ǵalamdyq deńgeide alańdaýshylyq týdyratyn shtamdar tizimine engizgen. Bul tizimge virýstyń tez juǵatyn, aýrýdy asqyndyryp jiberetin jáne vaktsina men dári-dármekke boi bermeitin túrleri engen.
