pixabay
Resei Ýkrainaǵa Qara teńiz porttarynan astyq eksporttaýǵa múmkindik beretin, halyqaralyq deldaldyq arqyly jasalǵan mámilege qatysýyn toqtatatynyn málimdedi, - dep habarlaidy Tengrinews.kz portaly BBC agenttigine silteme jasap.
Mundai sheshim Resei Ýkrainany Qyrymdaǵy Sevastopol qalasynda ornalasqan Qara teńiz flotyna jappai dron shabýylyn jasady dep aiyptaǵanyna birneshe saǵat ótken soń qabyldanǵan.
"Resei tarapy "Qara teńiz bastamasyna" qatysatyn azamattyq qurǵaq júktiń qaýipsizdigine kepildik bere almaidy jáne ony júzege asyrýdy búginnen bastap belgisiz merzimge toqtatady. Ystambulda ornalasqan ýkrainalyq azyq-túlikti tasymaldaýdy baqylaityn birlesken úilestirý ortalyǵyndaǵy Resei ókilderine tiisti nusqaýlar berildi", - delingen Resei SIM málimdemesinde.
Resei Qorǵanys ministrligi senbidegi shabýylda paidalanylǵan drondar astyq mámilesine qatysty kemelerge baǵyttalǵanyn aitty. Ministrlik málimetinshe, bir kemege shamaly zaqym kelgen.
BUU ókili Túrkiiamen kelisimge deldal bolǵan uiym Máskeýmen bailanysta ekenin aitty. Ol "barlyq taraptyń Qara teńizdegi astyq bastamasyna qaýip tóndiretin kez kelgen áreketten bas tartýy mańyzdy" ekenin málimdedi.
Aita keteiik, kelisim Ýkrainaǵa qaqtyǵys bastalǵannan keiin qiyndyq týǵyzǵan Qara teńizden astyq eksportyn qalpyna keltirýge múmkindik berdi. Eksportty BUU bas hatshysynyń ózi kelisip, muny jahandyq azyq-túlik daǵdarysyn jeńildetýge kómektesken iri diplomatiialyq jeńis retinde atap ótken edi.
