Resei qorǵanys ministrligi Siriiada "Islam memleketi" ekstremistik uiymynyń áskeri jetekshisi, tájikstandyq arnaiy jasaqtyń burynǵy komandiri Gýlmýrod Halimovtyń kózi joiylǵanyn málimdedi, dep habarlaidy "Ult aqparat" Azattyqqa silteme jasap.
Ministrlik aqparatyna qaraǵanda, Halimov pen IM-niń birneshe joǵary shendi komandiri Siriia armiiasy men jihadshylar arasynda soǵys júrip jatqan Deir ál-Zor qalasynyń mańynda jerasty nysanynda bolǵan. Reseilik áskeriler IM shepterine áýeden soqqy jasalyp, nátijesinde 40 shaqty sodyrdyń, onyń ishinde Halimovtyń kózi joiylǵan.
Halimovtyń ólimin ázirge basqa beitarap aqparat kózderinen anyqtaý múmkin bolmai tur.
Polkovnik Gýlmýrod Halimov 2015 jyldyń sáýirinde kenetten joǵalyp ketti, mamyrdyń sońynda IM jasaǵyna qosylǵanyn málimdegen. Siriiada túsirilgenge uqsaityn beinebaianda Halimov biliktiń saiasatyna narazylyq retinde ásiredinshilderge qosylǵanyn aitady. Halimov byltyr jazda IM áskeri ministri mindetin atqarýshy bolyp taǵaiyndalǵan edi.
Tájikstan biligi polkovnikti "otanyna opasyzdyq jasady" dep aiyptap, Interpol arqyly izdestirip jatyr. AQSh Gýlmýrod Halimovtyń ornalasqan jeri týraly aqparat bergen adamǵa 3 million dollar syi tikti.
Times jýrnaly biyl sáýirdiń 15-i kúni "Gýlmýrod Halimov Mosýldyń batysyndaǵy aviasoqqy kezinde qaza tapty" dep jazǵan. Biraq Dýshanbe burynǵy komandirdiń qazasy týraly aqparat almaǵandaryn aitqan.
Biyl shildeniń basynda Tájikstanda Halimovtyń tórt týysy Aýǵanstanǵa ótpek bolǵanda kózi joiylyp, taǵy úsheýi qolǵa túsken.
