Máskeý prokýratýrasy qala meri Sergei Sobianinniń qashyqtan isteitin qyzmetkerler deregin jinaý týraly jarlyǵynyń zańdylyǵyn teksere bastady. Máskeý qalalyq dýmasyna "Ádiletti Resei" partiiasynan sailanǵan depýtat Mihail Timonov Facebook paraqshasynda osylai dep habarlady.
Ol osyǵan deiin ózge depýtattarmen birge quqyq qorǵaý organdarynan qala ákimshiligi jarlyǵynyń zańdylyǵyn tekserýdi ótingen edi. Resei zańnamasy jumys berýshilerge jumysshylardyń jeke málimetin olardyń jazbasha ruqsatynsyz berýge tyiym salady.
Osyǵan deiin reseilik birneshe IT kompaniiasy da osyǵan uqsas ótinish jasaǵan. Alaida tsifrlyq damý ministrligi Máskeý ákimshiliginiń áreketinen zańsyz nárse tappaǵan.
Jumysshylardyń jeke málimetin berý týraly talapty zańgerler men quqyq qorǵaýshylar synaǵan. Zańgerlerdiń aitýynsha, "Sobianin jarlyq shyǵaryp, Eńbek kodeksi nemese Jeke málimet týraly zańdy ózgerte almaidy". Olardyń sózine qaraǵanda, jeke málimet uǵymyna adamdy anyqtaýǵa kómektesetin kez kelgen málimet, mysaly telefon nómiri de kiredi.
12 qazannan bastap kompaniialar qyzmetkerleriniń keminde 30 paiyzyn qashyqtan isteýge kóshirýi tiis jáne esep berý maqsatynda ákimshilikke qyzmetkerleriniń jeke málimetin berýi qajet.
Eger kompaniia talapty oryndamasa, olarǵa aiyppul salynýy múmkin jáne jumysy toqtatylýy múmkin dep aitylǵan.
Osyǵan deiin Máskeý biligi kompaniialardan jumysshylardyń "aty-jónin atamai nemese adamdy anyqtaýǵa kómektesetin ózge de málimetsiz" derek suraý zańǵa qaishy emes dep málimdegen. Olar qyzmetkerlerdiń júrgen jerin anyqtaýǵa tyryspaitynyn, tek shekteý sharalarynyń tiimdiligin baǵalaǵysy kelgenin aitqan.
