Qazaqstan men Resei prezidentteriniń resmi kezdesýiniń qorytyndysy boiynsha jýrnalistermen baspasóz máslihatyn ótkizgen Vladimir Pýtin Joǵary Eýraziialyq ekonomikalyq qaýymdastyǵynyń májilisine qatysatynyn aitty.
Atalmysh shara 29 mamyrda Nur-Sultanda ótedi, dep habarlaidy QazAqparat agenttigi.
«Qazaqstan Prezidenti Toqaevpen biz jýyrda taǵy kezdesemiz. 29 mamyrda Nur-Sultanda Joǵary Eýraziialyq ekonomikalyq qaýymdastyǵynyń májilisi ótedi. Bul jiyn osy uiymnyń 5 jyldyǵyna qarai uiymdastyrylǵaly otyr», - dedi V. Pýtin.
Resei basshysy óz sózinde 5 jyldyq merekege bailanysty ótkizilgeli otyrǵan jiynnyń EýrAzEQ-ti bekitý týraly kelisimge qol qoiylǵan Qazaqstan astanasynda uiymdastyrylýy jaqsylyqtyń nyshany ekenin atap ótti.
«Osylaisha, biz Odaqty qurýǵa usynys jasap, eýraziialyq yqpaldastyq jobasynyń negizin qalaýda mańyzdy ról atqarǵan Nursultan Ábishuly Nazarbaevtyń eńbegine nazar aýdarǵymyz keledi», - dedi Resei prezidenti.
Sondai-aq, Vladimir Pýtin Qasym-Jomart Toqaevty Resei men Qazaqstannyń XVI óńiraralyq yntymaqtastyq forýmyna shaqyrdy.
«Biylǵy jyly jiyn Omskide qarasha aiynda ótedi. Men oǵan Qazaqstan Prezidentin de shaqyrdym», - dedi Resei basshysy.
V.Pýtin sonymen qatar Omskide ótetin óńiraralyq yntymaqtastyq máselesine arnalǵan shara aiasynda Qazaqstan men Reseidiń jas kóshbasshylary forýmy ótetindigin aitty.
«Osy shara aiasynda Resei men Qazaqstannyń jas kóshbasshylarynyń forýmyn ótkizý durys dep sheshtik», - dep qosty Vladimir Pýtin.
«Sóz sońynda Qazaqstan Prezidentine, Qazaqstannan kelgen barlyq áriptesterime jáne dostarymyzǵa aýqymdy, nátijeli kelissózder úshin alǵysymdy bildirgim keledi. Búgingi kezdesýimizdiń nátijesi Qazaqstan men Reseidiń odaqtas retindegi qarym-qatynasyna igi yqpalyn tigizedi degen oidamyn», - dedi Resei basshysy Máskeýde ótken kelissózder qorytyndysy boiynsha.
