Resei Ortalyq sailaý komissiiasy (OSK) eldegi prezident sailaýyna qatysqan sailaýshylar daýsynyń 40 paiyzy sanalǵannan keiingi málimetin jariialady. Komissiia málimeti boiynsha, is basyndaǵy prezident Vladiir Pýtin sailaýshylardyń 74 paiyz daýsyn jinaǵan.
18 naýryz kúni túnge qarai Pýtin Máskeýdegi Manejnyi alańynda ótken miting-kontsertte sóilep, sailaýshylarǵa alǵys aitty.
Pýtinnen keiingi orynda Resei Federatsiiasy kommýnistik partiiasynyń kandidaty Pavel Grýdinin (14 paiyz) tur. "Interfaks" agenttiginiń habarlaýynsha, Grýdinin sailaý ádil ótpegenin málimdegen. Resei liberal-demokratiialyq partiiasynyń jetekshisi Vladimir Jirinovskii úshinshi, "Grajdanskaia initsiativa" tobynan Kseniia Sobchak tórtinshi orynda tur.
"Iabloko" partiiasynyń negizin qalaýshy Grigorii Iavlinskii, "Partiia rosta" saiasi uiymy lideri Boris Titov, "Kommýnisty Rossii" partiiasy jetekshisi Maksim Sýraikin jáne "Rossiiskii obshenarodnyi soiýz" partiiasynan túsken Sergei Babýrin, aldyn ala derekter boiynsha, árqaisysy bir paiyzǵa da tolmaityn daýys jinaǵan.
Sailaý ýchaskelerindegi jaǵdaidy baqylaǵan belsendiler daýys beretin jerge sailaýshylardy uiymdastyrǵan túrde jappai ákelý, sailaý jáshikterine biýlletenderdi toptap tastaý tárizdi zań erejesin buzý jaittaryn tirkegen. Sonymen birge baqylaýshylarǵa kúsh qoldanylǵan birneshe oqiǵa bolǵany týraly aqparat taraǵan.
Ortalyq sailaý komissiiasy sailaý "ashyq" ótkenin jáne "aitarlyqtai óreskel zań buzý bolmaǵanyn" málimdedi.
65 jastaǵy Vladimir Pýtin Reseidi 2000 jyldan beri basqaryp keledi. Ol 13 jyl prezident, onyń arasynda tórt jyl premer-ministr qyzmetin atqardy.
