Máskeý mańyndaǵy túrmede otyrǵan reseilik oppozitsiialyq saiasatker Aleksei Navalnyi ózine dáriger jiberýdi talap etip, ashtyq jariialady. Navalnyidyń advokattary arqyly berip jibergen aryzy saiasatkerdiń Instagramdaǵy paraqshasynda jariialandy.
"Meniń dárigerdi shaqyryp, dári-dármek alýǵa quqyǵym bar. Maǵan ekeýin de ótkizbei jatyr. Belimdegi aýrý aiaqqa kóshti. Birinshi oń aiaǵym, endi sol aiaǵym sezýdi qoidy. Alańdatarlyq jaǵdai" dep jazdy Navalnyi.
Oppozitsionerdiń aitýynsha, oǵan meditsinalyq kómek kórsetýdiń ornyna "bir túnde segiz ret oiatyp" uiyqtaýyna kedergi jasaidy. Túrmede ashtyqtan basqa kúresý amaly qalmaǵan.
Buǵan deiin Navalnyidyń advokattary saiasatkerdiń densaýlyǵynyń kúrt nasharlaǵanyn aitqan. Olardyń aitýynsha, Navalnyidyń beli qatty aýyrady, aiaǵy uiidy. Navalnyi advokattaryna qajetti meditsinalyq kómek ala almai júrgenin, túrme ákimshiligi shaǵymdaryna reaktsiia tanytpaǵanyn jetkizgen. Oǵan tek aýrýdy basatyn Ibýprofenniń birneshe tabletkasyn jazyp bergen. Navalnyi sonymen birge túrme dárigerleriniń diagnozy men kompiýterlik tomografiia nátijesin aitpai otyrǵanyn da habarlaǵan.
Osyǵan deiin Qylmystyq jazany oryndaý federaldyq qyzmeti (FSIN) Navalnyidyń túrmede meditsinalyq tekseristen ótkenin málimdep, densaýlyǵyn "turaqty" ári "ortasha" dep baǵalaǵan. Vladimir oblysynyń qoǵamdyq baqylaý komissiiasy tóraǵasynyń orynbasary Vladimir Grigorian oppozitsioner "simýliatsiia jasap otyr" dep málimdegen. Biraq ol qandai aqparatqa súienip, tujyrymdaǵanyn aitpaǵan.
2 aqpanda Máskeýdiń Simonov soty Aleksei Navalnyidy 2013 jyly "Iv Roshe isi" boiynsha shyqqan shartty jaza erejelerin oryndamady dep saiasatkerdi túrmege jibergen. Eýropanyń Adam quqyǵy jónindegi soty istiń saiasilanǵanyn aiqan. Oppozitsioner túrmede shamamen 2,5 jyl bolady.
Aleksei Navalnyi komandasy kóktemde Resei aimaqtarynda saiasatkerdi bosatýdy talap etip, iri mitingiler uiymdastyratynyn habarlaǵan.
