مەسكەۋ ماڭىنداعى تٷرمەدە وتىرعان رەسەيلٸك وپپوزيتسييالىق ساياساتكەر الەكسەي ناۆالنىي ٶزٸنە دەرٸگەر جٸبەرۋدٸ تالاپ ەتٸپ, اشتىق جارييالادى. ناۆالنىيدىڭ ادۆوكاتتارى ارقىلى بەرٸپ جٸبەرگەن ارىزى ساياساتكەردٸڭ ينستاگرامداعى پاراقشاسىندا جارييالاندى.
"مەنٸڭ دەرٸگەردٸ شاقىرىپ, دەرٸ-دەرمەك الۋعا قۇقىعىم بار. ماعان ەكەۋٸن دە ٶتكٸزبەي جاتىر. بەلٸمدەگٸ اۋرۋ اياققا كٶشتٸ. بٸرٸنشٸ وڭ اياعىم, ەندٸ سول اياعىم سەزۋدٸ قويدى. الاڭداتارلىق جاعداي" دەپ جازدى ناۆالنىي.
وپپوزيتسيونەردٸڭ ايتۋىنشا, وعان مەديتسينالىق كٶمەك كٶرسەتۋدٸڭ ورنىنا "بٸر تٷندە سەگٸز رەت وياتىپ" ۇيىقتاۋىنا كەدەرگٸ جاسايدى. تٷرمەدە اشتىقتان باسقا كٷرەسۋ امالى قالماعان.
بۇعان دەيٸن ناۆالنىيدىڭ ادۆوكاتتارى ساياساتكەردٸڭ دەنساۋلىعىنىڭ كٷرت ناشارلاعانىن ايتقان. ولاردىڭ ايتۋىنشا, ناۆالنىيدىڭ بەلٸ قاتتى اۋىرادى, اياعى ۇييدى. ناۆالنىي ادۆوكاتتارىنا قاجەتتٸ مەديتسينالىق كٶمەك الا الماي جٷرگەنٸن, تٷرمە ەكٸمشٸلٸگٸ شاعىمدارىنا رەاكتسييا تانىتپاعانىن جەتكٸزگەن. وعان تەك اۋرۋدى باساتىن يبۋپروفەننٸڭ بٸرنەشە تابلەتكاسىن جازىپ بەرگەن. ناۆالنىي سونىمەن بٸرگە تٷرمە دەرٸگەرلەرٸنٸڭ دياگنوزى مەن كومپيۋتەرلٸك توموگرافييا نەتيجەسٸن ايتپاي وتىرعانىن دا حابارلاعان.
وسىعان دەيٸن قىلمىستىق جازانى ورىنداۋ فەدەرالدىق قىزمەتٸ (فسين) ناۆالنىيدىڭ تٷرمەدە مەديتسينالىق تەكسەرٸستەن ٶتكەنٸن مەلٸمدەپ, دەنساۋلىعىن "تۇراقتى" ەرٸ "ورتاشا" دەپ باعالاعان. ۆلاديمير وبلىسىنىڭ قوعامدىق باقىلاۋ كوميسسيياسى تٶراعاسىنىڭ ورىنباسارى ۆلاديمير گريگوريان وپپوزيتسيونەر "سيمۋلياتسييا جاساپ وتىر" دەپ مەلٸمدەگەن. بٸراق ول قانداي اقپاراتقا سٷيەنٸپ, تۇجىرىمداعانىن ايتپاعان.
2 اقپاندا مەسكەۋدٸڭ سيمونوۆ سوتى الەكسەي ناۆالنىيدى 2013 جىلى "يۆ روشە ٸسٸ" بويىنشا شىققان شارتتى جازا ەرەجەلەرٸن ورىندامادى دەپ ساياساتكەردٸ تٷرمەگە جٸبەرگەن. ەۋروپانىڭ ادام قۇقىعى جٶنٸندەگٸ سوتى ٸستٸڭ ساياسيلانعانىن ايقان. وپپوزيتسيونەر تٷرمەدە شامامەن 2,5 جىل بولادى.
الەكسەي ناۆالنىي كومانداسى كٶكتەمدە رەسەي ايماقتارىندا ساياساتكەردٸ بوساتۋدى تالاپ ەتٸپ, ٸرٸ ميتينگٸلەر ۇيىمداستىراتىنىن حابارلاعان.
