Resei men Ýkraina 2020 jyldyń 1 qańtarynan bastap gaz tasymaldaýdyń negizgi sharttary boiynsha kelisimge keldi. Bul aqparatty Eýrokomissiianyń vitse-prezidenti Marosh Shefchovich Berlindegi baspasóz jiynynda aitty. Germaniia men Eýroodaq ókilderiniń qatysýymen bolǵan kezdesý toǵyz saǵatqa sozyldy, dep habarlady dpa agenttigi.
Reseidiń energetika ministri Aleksandr Navaktyń sózinshe, taraptar bolashaq kelisimniń sharttary jazylǵan hattamany ázirlegen. Ýkrainanyń energetika ministri Aleksei Orjel hattama jaily aqparatty rastady.
Shefshovichtiń sózine qaraǵanda kelisim-shart 20 jeltoqsanda Máskeý men Kievte talqylanbaq. Eýrokomissiianyń vitse-prezidenti jyl sońyna deiin kelisimge qol qoiyp úlgeretin shyǵarmyz dep úmit bildirdi.
Dpa agenttiginiń jazýynsha, taraptar Ýkraina arqyly Eýropaǵa tasymaldanatyn gaz kólemi men bolashaq kelisimniń merzimi boiynsha kelisimge kelgen. Biraq ázirge onyń jai-japsary aitylmaidy.
Qazirgi kelisim-sharttyń merzimi 2019 jyly 31 jeltoqsanda aiaqtalady. Bul kelisimdi uzartý máselesin Resei men Ýkraina basshylary Parijde eń alǵash ret kezdesken kezde de talqylaǵan, biraq túbegeili kelisimge kele almaǵan.
