Reseidiń zań shyǵarýshy organy Memlekettik dýma internettegi sailaýaldy úgit-nasihatty buǵattaý týraly zań jobasyn úshinshi ári qorytyndy oqylymda maquldady. Qujatta sailaý týraly zańnyń talabyn buzatyn materialdardyń buǵattalatyny jazylǵan. Oppozitsiia zań jobasynyń ózine qarsy baǵyttalǵan bolýy múmkin dep kúdiktenedi. Osy qujatpen birge zańsyz úgit-nasihat júrgizýge salynatyn aiyppul kólemin birneshe ese arttyratyn zań qabyldandy.
Memlekettik dýma zań jobasyna 17 aqpan kúni daýys berdi. 302 depýtat qoldap daýys berse, barlyǵy júz adamnan turatyn oppozitsiialyq fraktsiialar qarsy daýys berdi. Qujatty bilik partiiasy "Edinaia Rossiianyń" fraktsiiasy usyndy.
Qujat sailaý kúni bekitilgen kúnnen bastap, sailaý nátijesi jariialanǵannan bes kún ótkenge deiingi aralyqta jaryq kórgen aqparatty buǵattaýǵa múmkindik beredi.
Buǵattaý týraly sheshim sot sheshiminsiz qabyldana beredi. Sheshim qabyldaýǵa sailaý komissiialarynyń Roskomnadzor mekemesine shaǵym túsirýi jetkilikti. Kandidattyń sailaýaldy qorynan tólenbegen, sailaýǵa bir kún buryn qalǵanda jariialanǵan, memlekettik organdar ne sailaý komissiiasy músheleri jariialaǵan nasihat zańsyz sanalady.
Oppozitsiialyq fraktsiialardyń ókilderi zań azamattardy saiasi kózqarasy úshin jazalaýy múmkin deidi. Sondai-aq olardyń zańnyń bilikke qarsy shyqqandarǵa ǵana qoldanylatynyn aitady.
Sársenbi, 17 aqpan kúni Memlekettik dýma depýtattary zańsyz úgit-nasihat úshin salynatyn aiyppul kólemin arttyratyn zańǵa da daýys berdi. Endi azamattarǵa 20 myń rýblge deiin (113 myń teńge), laýazymdy tulǵalarǵa 50 myń rýblge deiin (283 myń teńge), kompaniialarǵa 500 myń rýblge deiin (2,8 million teńge) aiyppul salynýy múmkin. Osyǵan deiin atalǵan aiyppul kólemi joǵarydaǵy tártippen 1,5 myń rýbl, 2 myń rýbl jáne 30 myń rýbl bolatyn.
