رەسەيدٸڭ زاڭ شىعارۋشى ورگانى مەملەكەتتٸك دۋما ينتەرنەتتەگٸ سايلاۋالدى ٷگٸت-ناسيحاتتى بۇعاتتاۋ تۋرالى زاڭ جوباسىن ٷشٸنشٸ ەرٸ قورىتىندى وقىلىمدا ماقۇلدادى. قۇجاتتا سايلاۋ تۋرالى زاڭنىڭ تالابىن بۇزاتىن ماتەريالداردىڭ بۇعاتتالاتىنى جازىلعان. وپپوزيتسييا زاڭ جوباسىنىڭ ٶزٸنە قارسى باعىتتالعان بولۋى مٷمكٸن دەپ كٷدٸكتەنەدٸ. وسى قۇجاتپەن بٸرگە زاڭسىز ٷگٸت-ناسيحات جٷرگٸزۋگە سالىناتىن ايىپپۇل كٶلەمٸن بٸرنەشە ەسە ارتتىراتىن زاڭ قابىلداندى.
مەملەكەتتٸك دۋما زاڭ جوباسىنا 17 اقپان كٷنٸ داۋىس بەردٸ. 302 دەپۋتات قولداپ داۋىس بەرسە, بارلىعى جٷز ادامنان تۇراتىن وپپوزيتسييالىق فراكتسييالار قارسى داۋىس بەردٸ. قۇجاتتى بيلٸك پارتيياسى "ەدينايا روسسييانىڭ" فراكتسيياسى ۇسىندى.
قۇجات سايلاۋ كٷنٸ بەكٸتٸلگەن كٷننەن باستاپ, سايلاۋ نەتيجەسٸ جارييالانعاننان بەس كٷن ٶتكەنگە دەيٸنگٸ ارالىقتا جارىق كٶرگەن اقپاراتتى بۇعاتتاۋعا مٷمكٸندٸك بەرەدٸ.
بۇعاتتاۋ تۋرالى شەشٸم سوت شەشٸمٸنسٸز قابىلدانا بەرەدٸ. شەشٸم قابىلداۋعا سايلاۋ كوميسسييالارىنىڭ روسكومنادزور مەكەمەسٸنە شاعىم تٷسٸرۋٸ جەتكٸلٸكتٸ. كانديداتتىڭ سايلاۋالدى قورىنان تٶلەنبەگەن, سايلاۋعا بٸر كٷن بۇرىن قالعاندا جارييالانعان, مەملەكەتتٸك ورگاندار نە سايلاۋ كوميسسيياسى مٷشەلەرٸ جارييالاعان ناسيحات زاڭسىز سانالادى.
وپپوزيتسييالىق فراكتسييالاردىڭ ٶكٸلدەرٸ زاڭ ازاماتتاردى ساياسي كٶزقاراسى ٷشٸن جازالاۋى مٷمكٸن دەيدٸ. سونداي-اق ولاردىڭ زاڭنىڭ بيلٸككە قارسى شىققاندارعا عانا قولدانىلاتىنىن ايتادى.
سەرسەنبٸ, 17 اقپان كٷنٸ مەملەكەتتٸك دۋما دەپۋتاتتارى زاڭسىز ٷگٸت-ناسيحات ٷشٸن سالىناتىن ايىپپۇل كٶلەمٸن ارتتىراتىن زاڭعا دا داۋىس بەردٸ. ەندٸ ازاماتتارعا 20 مىڭ رۋبلگە دەيٸن (113 مىڭ تەڭگە), لاۋازىمدى تۇلعالارعا 50 مىڭ رۋبلگە دەيٸن (283 مىڭ تەڭگە), كومپانييالارعا 500 مىڭ رۋبلگە دەيٸن (2,8 ميلليون تەڭگە) ايىپپۇل سالىنۋى مٷمكٸن. وسىعان دەيٸن اتالعان ايىپپۇل كٶلەمٸ جوعارىداعى تەرتٸپپەن 1,5 مىڭ رۋبل, 2 مىڭ رۋبل جەنە 30 مىڭ رۋبل بولاتىن.
