Fýtboldan Resei quramasynyń oiynshysy Nadejda Karpova Ýkrainadaǵy soǵysqa qarsy sóilep, Vladimir Pýtin men Resei propagandasyn aiyptady.
Ispaniiada turyp, "Espanol" (Barselona) klýbynda oinaityn Nadejda Karpova Bi-bi-sige bergen suqbatynda "soǵysty kóre otyryp, únsiz qala almaitynyn" aitty.
Resei quramasynda 24 match oinaǵan 27 jastaǵy fýtbolshynyń sózinshe, "Pýtin soǵys bastap, reseilikterdiń bolashaǵyn urlaǵan".
"Munyń bári Resei azamattarynyń únsiz kelisiminiń arqasynda júzege asty, biraq men orys bolǵanym úshin uialmaimyn, Resei degenimiz - eldiń úkimeti, ne bolmasa Vladimir Pýtin emes" - deidi ol.
Ol Resei propagandasyn shovinizm dertine shaldyqqan dep aiyptap, propagandaǵa senetinderdi "kepilde otyrǵandar" dep atady.
Karpova Reseidegi qarsylyq aktsiialaryna qatysqanyn, biraq onysy bilikke yqpal etýge jetkiliksiz bolǵanyn aitty. Ol "soǵysqa qarsylyǵyn ashyq bildiretin sportshylar kóp uzamai kóbeie túsetinin, alaida Reseide turǵannan góri Ispaniiada turyp, soǵys týraly oi-pikir aitý jeńilirek" dep sanaitynyn aitqan.
Bi-bi-si habaryna qaraǵanda, buǵan deiin "Dinamo" fýtbolshysy Fiodor Smolov pen "Spartak" oiynshysy Aleksandr Sobolev sekildi eki belgili sportshy ǵana soǵysqa qarsylyǵyn bildirgen. Olar pikirin Resei áskeri Ýkrainaǵa basyp kirgen kúni aityp, keiin únsiz qalǵan.
Resei kásipqoi sportshylarynyń kópshiligi Ýkrainadaǵy soǵys týraly aitpaýǵa tyrysady, keibiri Pýtin saiasatyn ashyq qoldaidy. Resei Ýkrainaǵa basyp kirgen soń halyqaralyq sport federatsiialarynyń kópshiligi, arasynda FIFA da bar, Resei sportshylaryn halyqaralyq jarystardan shettetken.
