فۋتبولدان رەسەي قۇراماسىنىڭ ويىنشىسى نادەجدا كارپوۆا ۋكرايناداعى سوعىسقا قارسى سٶيلەپ, ۆلاديمير پۋتين مەن رەسەي پروپاگانداسىن ايىپتادى.
يسپانييادا تۇرىپ, "ەسپانول" (بارسەلونا) كلۋبىندا وينايتىن نادەجدا كارپوۆا بي-بي-سيگە بەرگەن سۇقباتىندا "سوعىستى كٶرە وتىرىپ, ٷنسٸز قالا المايتىنىن" ايتتى.
رەسەي قۇراماسىندا 24 ماتچ ويناعان 27 جاستاعى فۋتبولشىنىڭ سٶزٸنشە, "پۋتين سوعىس باستاپ, رەسەيلٸكتەردٸڭ بولاشاعىن ۇرلاعان".
"مۇنىڭ بەرٸ رەسەي ازاماتتارىنىڭ ٷنسٸز كەلٸسٸمٸنٸڭ ارقاسىندا جٷزەگە استى, بٸراق مەن ورىس بولعانىم ٷشٸن ۇيالمايمىن, رەسەي دەگەنٸمٸز - ەلدٸڭ ٷكٸمەتٸ, نە بولماسا ۆلاديمير پۋتين ەمەس" - دەيدٸ ول.
ول رەسەي پروپاگانداسىن شوۆينيزم دەرتٸنە شالدىققان دەپ ايىپتاپ, پروپاگانداعا سەنەتٸندەردٸ "كەپٸلدە وتىرعاندار" دەپ اتادى.
كارپوۆا رەسەيدەگٸ قارسىلىق اكتسييالارىنا قاتىسقانىن, بٸراق ونىسى بيلٸككە ىقپال ەتۋگە جەتكٸلٸكسٸز بولعانىن ايتتى. ول "سوعىسقا قارسىلىعىن اشىق بٸلدٸرەتٸن سپورتشىلار كٶپ ۇزاماي كٶبەيە تٷسەتٸنٸن, الايدا رەسەيدە تۇرعاننان گٶرٸ يسپانييادا تۇرىپ, سوعىس تۋرالى وي-پٸكٸر ايتۋ جەڭٸلٸرەك" دەپ سانايتىنىن ايتقان.
بي-بي-سي حابارىنا قاراعاندا, بۇعان دەيٸن "دينامو" فۋتبولشىسى فيودور سمولوۆ پەن "سپارتاك" ويىنشىسى الەكساندر سوبولەۆ سەكٸلدٸ ەكٸ بەلگٸلٸ سپورتشى عانا سوعىسقا قارسىلىعىن بٸلدٸرگەن. ولار پٸكٸرٸن رەسەي ەسكەرٸ ۋكرايناعا باسىپ كٸرگەن كٷنٸ ايتىپ, كەيٸن ٷنسٸز قالعان.
رەسەي كەسٸپقوي سپورتشىلارىنىڭ كٶپشٸلٸگٸ ۋكرايناداعى سوعىس تۋرالى ايتپاۋعا تىرىسادى, كەيبٸرٸ پۋتين ساياساتىن اشىق قولدايدى. رەسەي ۋكرايناعا باسىپ كٸرگەن سوڭ حالىقارالىق سپورت فەدەراتسييالارىنىڭ كٶپشٸلٸگٸ, اراسىندا فيفا دا بار, رەسەي سپورتشىلارىن حالىقارالىق جارىستاردان شەتتەتكەن.
